प्रताप मिलच्या ‘राजा’चा जल्लोष! विविध स्पर्धांच्या विजेत्यांचा दिमाखात सन्मान , गणेशोत्सव २०२६ निमित्त रंगलेल्या स्पर्धांचा बक्षीस वितरण सोहळा उत्साहात संपन्न

अमळनेर प्रतिनिधी: प्रताप मिल परिसरातील ‘प्रताप मिलचा राजा’ गणेशोत्सव २०२६ निमित्त आयोजित विविध स्पर्धांचा बक्षीस वितरण सोहळा उत्साहपूर्ण वातावरणात संपन्न झाला. प्रताप मिलचा राजा, अमळनेर आणि दैनिक बातमीदार यांच्या संयुक्त विद्यमाने या विविध स्पर्धांचे आयोजन करण्यात आले होते. स्पर्धांमध्ये उत्स्फूर्त सहभाग नोंदविणाऱ्या विजेत्यांचा प्रमुख पाहुणे श्री. नीरजभाऊ अग्रवाल, सुप्रसिद्ध उद्योजक तथा मा. खा. शी. मंडळ कार्याध्यक्ष यांच्या हस्ते गौरव करण्यात आला.

गणेशोत्सवाच्या उत्साहाला विविध स्पर्धांची रंगत लाभल्याने प्रताप मिल परिसरात आनंदाचे वातावरण निर्माण झाले होते. लिंबू-चमचा, मटकी फोड, डान्स, संगीत खुर्ची, क्रिकेट बॉल, चित्रकला यांसह विविध स्पर्धांमध्ये बालकांपासून तरुणांपर्यंत अनेक स्पर्धकांनी उत्स्फूर्त सहभाग घेत आपले कलागुण व कौशल्य सादर केले.

विविध स्पर्धांमध्ये उल्लेखनीय कामगिरी करणाऱ्या विजेत्या स्पर्धकांना मान्यवरांच्या हस्ते बक्षिसे व सन्मानपत्र देऊन गौरविण्यात आले. आपल्या कलागुणांना व्यासपीठ मिळाल्याने विजेत्यांसह सहभागी स्पर्धकांमध्येही मोठा उत्साह पाहायला मिळाला.

या प्रसंगी दैनिक बातमीदारचे कार्यकारी संपादक श्री. अरविंद बाबिस्कर, अमळनेर ब्युरो चीफ श्री. बापूराव पाटील (ठाकरे), मुख्य संपादक श्री. हेमंत पाटील यांच्यासह गणेशोत्सव मंडळाचे पदाधिकारी, कार्यकर्ते, स्पर्धक आणि नागरिक मोठ्या संख्येने उपस्थित होते.

कलागुणांना व्यासपीठ, उत्साहाला मिळाली दाद!

स्पर्धकांच्या कलागुणांना वाव मिळावा, त्यांच्यातील सुप्त कला-कौशल्याला प्रोत्साहन मिळावे आणि गणेशोत्सवाचा आनंद सर्वांना एकत्रितपणे घेता यावा, या उद्देशाने अशा विविध उपक्रमांचे आयोजन करण्यात आले. प्रमुख पाहुणे श्री. नीरजभाऊ अग्रवाल यांच्या हस्ते विजेत्यांचा गौरव झाल्याने कार्यक्रमाला विशेष महत्त्व प्राप्त झाले.

प्रताप मिल कंपाऊंड परिसरातील नागरिकांनीही या उपक्रमाला मोठा प्रतिसाद देत स्पर्धकांचा उत्साह वाढविला. त्यामुळे संपूर्ण परिसरात गणेशभक्ती, मनोरंजन आणि उत्साहाचा सुंदर संगम पाहायला मिळाला.