दिवाळीपूर्वी शिक्षकांना वेतन मिळणार! शिक्षक महासंघाचे अध्यक्ष अनिल बोरनारे यांची मागणी मान्य; शिक्षकांना मोठा दिलासा

मुंबई : प्रतिनिधी

दिवाळीचा सण आनंदात आणि उत्साहात साजरा करता यावा, यासाठी शिक्षकांना दिवाळीपूर्वी वेतन अदा करण्यात यावे, अशी आग्रही मागणी शिक्षक महासंघ मुंबई व कोकण विभागाच्या वतीने करण्यात आली होती. या मागणीला सकारात्मक प्रतिसाद मिळाल्याने शिक्षकांना दिवाळीपूर्वी वेतन मिळण्याचा मार्ग मोकळा झाला असून, शिक्षक व शिक्षकेतर कर्मचाऱ्यांना मोठा दिलासा मिळाला आहे.

शिक्षक आणि शिक्षकेतर कर्मचाऱ्यांचे वेतन वेळेवर होणे ही केवळ प्रशासकीय जबाबदारी नसून, त्यांच्या आर्थिक स्थैर्याशी आणि सणाच्या आनंदाशी निगडित महत्त्वाची बाब आहे. अनेक शिक्षकांना कौटुंबिक जबाबदाऱ्या, घरखर्च आणि सणाच्या तयारीसाठी वेतनाची प्रतीक्षा असते. त्यामुळे दिवाळीपूर्वी वेतन मिळावे, यासाठी शिक्षक महासंघाने संबंधित यंत्रणेकडे सातत्याने पाठपुरावा केला होता.

शिक्षक महासंघाचे अध्यक्ष अनिल बोरनारे यांनी शिक्षकांच्या या जिव्हाळ्याच्या प्रश्नाला प्राधान्य देत दिवाळीपूर्वी वेतन देण्याची मागणी लावून धरली. या मागणीला मान्यता मिळाल्याने शिक्षक वर्गात समाधानाचे वातावरण निर्माण झाले आहे.

शिक्षकांच्या न्याय्य मागण्यांसाठी शिक्षक महासंघ मुंबई व कोकण विभाग यापुढेही सातत्याने प्रयत्नशील राहील. शिक्षकांचे वेतन, सेवा विषयक प्रश्न आणि प्रलंबित आर्थिक लाभ वेळेत मिळावेत, यासाठी महासंघाचा पाठपुरावा सुरूच राहील, अशी भूमिका अध्यक्ष अनिल बोरनारे यांनी व्यक्त केली.

“शिक्षकांच्या चेहऱ्यावर समाधान आणि त्यांच्या कुटुंबात दिवाळीचा आनंद फुलवणे, हेच शिक्षक महासंघाच्या लढ्याचे खरे यश आहे.”

— शिक्षक महासंघ, मुंबई व कोकण विभाग