अमळनेरच्या फार्मसी महाविद्यालयात मोफत आरोग्य तपासणी शिबिर उत्साहात संपन्न १५० हून अधिक विद्यार्थ्यांनी घेतला आरोग्य तपासणीचा लाभ रक्त, डोळे व दंत तपासणीसह विविध आरोग्य तपासण्या संपन्न

अमळनेर प्रतिनिधी) :

निरोगी आरोग्य हीच यशस्वी जीवनाची खरी

गुरुकिल्ली असून, विद्यार्थ्यांमध्ये आरोग्याविषयी जागरूकता निर्माण व्हावी, तसेच त्यांना विविध आरोग्य तपासणी सुविधांचा लाभ मिळावा, या उदात्त उद्देशाने खान्देश शिक्षण मंडळ संचलित स्व. श्री. पी. सी. भांडारकर कॉलेज ऑफ डी. फार्मसी व स्व. प्रा. आर. के. केले कॉलेज ऑफ बी. फार्मसी, अमळनेर येथे मोफत आरोग्य तपासणी शिबिराचे उत्साहपूर्ण वातावरणात आयोजन करण्यात आले. या शिबिराला विद्यार्थ्यांचा उत्स्फूर्त प्रतिसाद लाभला असून, १५० हून अधिक विद्यार्थ्यांनी विविध आरोग्य तपासण्या करून घेतल्या.

मा. ना. चंद्रकांतदादा पाटील व समर्थ युवा फाउंडेशन यांच्या पुढाकारातून विविध सामाजिक व शैक्षणिक संस्थांच्या संयुक्त विद्यमाने आयोजित करण्यात आलेल्या 'आरोग्यसेवा मोफत आरोग्य तपासणी शिबिरा' अंतर्गत महाविद्यालयातील विद्यार्थ्यांना विविध वैद्यकीय तपासणी सुविधा उपलब्ध करून देण्यात आल्या.

या शिबिरामध्ये रक्तदाब तपासणी, रक्तगट तपासणी, रक्तातील साखरेचे प्रमाण, हिमोग्लोबिन व रक्तातील इतर घटकांची तपासणी, डोळ्यांची

तपासणी तसेच दातांची तपासणी अशा विविध आरोग्य तपासण्या करण्यात

आल्या. विशेषतः डोळ्यांच्या तपासणीद्वारे विद्यार्थ्यांच्या दृष्टीसंबंधित समस्या जाणून घेण्यात आल्या, तर दंत तपासणीच्या माध्यमातून दातांचे आरोग्य, मौखिक स्वच्छता व दातांची नियमित काळजी घेण्याबाबत मार्गदर्शन करण्यात आले. तसेच विद्यार्थ्यांना संतुलित आहार, वैयक्तिक स्वच्छता आणि नियमित आरोग्य तपासणीचे महत्त्व पटवून देण्यात आले. आधुनिक वैद्यकीय सुविधांनी सुसज्ज असलेल्या मोबाईल मेडिकल व्हॅनच्या माध्यमातून विविध तपासण्या करण्यात आल्या.

माधव वाघ सर तसेच महाविद्यालयाचे प्राचार्य मा. डॉ. धनंजय पाटील सर यांची प्रमुख उपस्थिती लाभली..

विद्यार्थ्यांचे शारीरिक व मानसिक आरोग्य सुदृढ राहणे ही त्यांच्या सर्वांगीण विकासाची महत्त्वाची गरज आहे. शैक्षणिक प्रगतीबरोबरच आरोग्याची काळजी घेणेही तितकेच आवश्यक असल्याने अशा आरोग्यविषयक उपक्रमांचे आयोजन महत्त्वपूर्ण ठरते. या उपक्रमाच्या माध्यमातून विद्यार्थ्यांना स्वतःच्या आरोग्याविषयी जागरूक होण्याची आणि प्रतिबंधात्मक आरोग्यसेवेचे महत्त्व समजून घेण्याची संधी मिळाली.

शिबिराच्या यशस्वी आयोजनासाठी महाविद्यालयातील सर्व शिक्षक व शिक्षकेतर कर्मचाऱ्यांनी सक्रिय सहभाग नोंदविला. विद्यार्थ्यांची नोंदणी, तपासणीसाठी आवश्यक व्यवस्था, वैद्यकीय पथकाशी समन्वय तसेच कार्यक्रमाचे नियोजन अत्यंत शिस्तबद्ध पद्धतीने करण्यात आले.

या संपूर्ण आरोग्य तपासणी शिबिराचे नियोजन व समन्वयाची जबाबदारी प्रा. सतीश ब्राम्हणे व प्रा. वैभव पाटील यांनी यशस्वीरीत्या पार पाडली. त्यांच्या नियोजनबद्ध कार्यामुळे शिबिर सुरळीतपणे पार पडले. या उपक्रमाच्या यशस्वितेसाठी महाविद्यालयातील सर्व शिक्षक, शिक्षकेतर कर्मचारी व विद्यार्थ्यांचे मोलाचे सहकार्य लाभले.

सामाजिक बांधिलकी जोपासत विद्यार्थ्यांच्या आरोग्य संवर्धनासाठी राबविण्यात आलेला हा उपक्रम अत्यंत स्तुत्य ठरला. शिक्षणासोबत आरोग्य संवर्धन आणि सामाजिक उत्तरदायित्वाची जाणीव निर्माण करणारा हा उपक्रम विद्यार्थ्यांसाठी प्रेरणादायी ठरला. महाविद्यालयाच्या या आरोग्याभिमुख उपक्रमाचे उपस्थितांनी कौतुक केले.

छायाचित्र ओळ :

अमळनेर येथील फार्मसी महाविद्यालयात आयोजित मोफत आरोग्य तपासणी शिबिरात विद्यार्थ्यांची रक्त, डोळे व दंत तपासणी करताना वैद्यकीय पथक व उपस्थित मान्यवर.