SNA SPARSH प्रणालीच्या प्रभावी अंमलबजावणीसाठी अमळनेरमध्ये प्रशिक्षण , मुख्याध्यापक, केंद्र समन्वयक व विशेष शिक्षकांचा सहभाग; ऑनलाइन प्रक्रियेचे प्रात्यक्षिकासह सविस्तर मार्गदर्शन

अमळनेर प्रतिनिधी : गटसाधन केंद्र, पंचायत समिती अमळनेर यांच्या वतीने तालुक्यातील केंद्र समन्वयक, जिल्हा परिषद, नगरपरिषद व शासकीय आश्रमशाळांचे मुख्याध्यापक, साधन व्यक्ती, IED तालुका समन्वयक तसेच विशेष शिक्षकांसाठी SNA SPARSH कार्यपद्धती हाताळणी प्रशिक्षण आयोजित करण्यात आले. हे प्रशिक्षण बुधवार, दि. १ ऑक्टोबर २०२६ रोजी आय.एम.ए. हॉल, जी.एस. हायस्कूल, अमळनेर येथे पार पडले.

गटशिक्षणाधिकारी कविता सुर्वे व शिक्षण विस्तार अधिकारी प्रमोद पाटील यांच्या प्रमुख उपस्थितीत प्रशिक्षणाचे आयोजन करण्यात आले. यावेळी जि.प. जळगाव येथील वरिष्ठ लेखा सहाय्यक पद्माकर वाणी यांनी एल.सी.डी. प्रोजेक्टरच्या माध्यमातून SNA SPARSH प्रणालीची ऑनलाइन प्रक्रिया, कार्यपद्धती आणि प्रत्यक्ष हाताळणी याबाबत सविस्तर मार्गदर्शन केले.

प्रशिक्षणादरम्यान प्रणालीमध्ये विविध प्रक्रिया कशा पद्धतीने पूर्ण करावयाच्या, ऑनलाइन पद्धतीने कामकाज करताना कोणत्या बाबींची काळजी घ्यावी तसेच प्रणालीचा प्रभावी व अचूक वापर कसा करावा, याचे प्रत्यक्ष प्रात्यक्षिक देण्यात आले. सहभागी अधिकारी व शिक्षकांनी उपस्थित केलेल्या विविध प्रश्नांचे निरसनही पद्माकर वाणी यांनी केले.

गटशिक्षणाधिकारी कविता सुर्वे यांनी प्रास्ताविकातून SNA SPARSH प्रणालीचे महत्त्व स्पष्ट करताना मुख्याध्यापकांची भूमिका आणि जबाबदाऱ्या याबाबत मार्गदर्शन केले. शिक्षण विभागातील कामकाज अधिक सुलभ, पारदर्शक आणि डिजिटल पद्धतीने करण्यासाठी अशा प्रशिक्षणांचे महत्त्व असल्याचे यावेळी स्पष्ट करण्यात आले.

कार्यक्रमाचे सूत्रसंचालन तंत्रस्नेही शिक्षक दत्तात्रय सोनवणे यांनी केले, तर केंद्र समन्वयक किरण शिसोदे यांनी उपस्थितांचे आभार मानले.

प्रशिक्षणाच्या यशस्वी आयोजनासाठी तालुका वरिष्ठ लेखा सहाय्यक विजय बारी, सर्व तंत्रस्नेही शिक्षक, साधन व्यक्ती, अपंग समावेशित तालुका समन्वयक तसेच विशेष शिक्षक यांनी सहकार्य केले. प्रशिक्षणामुळे सहभागी अधिकारी व शिक्षकांना SNA SPARSH प्रणालीच्या प्रत्यक्ष वापराबाबत अधिक स्पष्टता मिळाली.