सी. आर. पाटील इंटरनॅशनल स्कूलमध्ये आषाढी एकादशी निमित्त वारीचे आयोजन

सी. आर. पाटील इंटरनॅशनल स्कूलमध्ये आषाढी एकादशी निमित्त वारीचे आयोजन

अमळनेर – सी. आर. पाटील इंटरनॅशनल स्कूल, तांबेपुरा येथे आषाढी एकादशी निमित्त विद्यार्थ्यांमध्ये सांस्कृतिक व आध्यात्मिक मूल्यांची जाणीव निर्माण करण्यासाठी भव्य वारीचे आयोजन करण्यात आले. या कार्यक्रमात शाळेतील विद्यार्थी, शिक्षक व कर्मचारी मोठ्या उत्साहाने सहभागी झाले.

कार्यक्रमाची सुरुवात भगवान विठ्ठल व रुख्मिणी यांच्या पूजनाने करण्यात आली. शाळेच्या परिसरात पालखी सजवून पारंपरिक वारी काढण्यात आली. विद्यार्थ्यांनी वारकऱ्यांचा पारंपरिक वेश परिधान करून टाळ-मृदुंगाच्या तालावर “ज्ञानोबा माऊली”, “तुकाराम” यांच्या गजरात वातावरण भक्तिमय केले.

यानंतर ही वारी जवळील महादेव मंदिरात नेण्यात आली. मंदिरात जाऊन सर्वांनी दर्शन घेतले व भजन-कीर्तन सादर करून भक्तिमय वातावरण निर्माण केले. या उपक्रमामुळे विद्यार्थ्यांना धार्मिक परंपरा आणि श्रद्धेचा प्रत्यक्ष अनुभव मिळाला.

विद्यार्थ्यांनी अभंग, भजन आणि कीर्तन सादर करून आषाढी एकादशीचे महत्त्व पटवून दिले. तसेच वारीच्या माध्यमातून संत परंपरेचे विचार, एकता, श्रद्धा आणि शिस्त यांचे महत्त्व विद्यार्थ्यांना समजावण्यात आले.

शाळेच्या मुख्याध्यापकांनी विद्यार्थ्यांना संबोधित करताना सांगितले की, अशा उपक्रमांमुळे विद्यार्थ्यांमध्ये संस्कार, शिस्त आणि भारतीय परंपरेची जाणीव वाढते. कार्यक्रमाच्या शेवटी सर्व विद्यार्थ्यांना प्रसाद वाटप करण्यात आले.

या उपक्रमामुळे संपूर्ण शाळेचा परिसर भक्तिमय वातावरणाने भारावून गेला आणि विद्यार्थ्यांना आषाढी एकादशीचा खरा अर्थ अनुभवता आला.