देशभक्त असाल तर पेटून उठाल, अंधभक्त असाल तर डोळे मिटून बसाल”-माजी आमदार डॉ. बी. एस. पाटील यांचा सरकारवर घणाघात जंतर-मंतरवरील विद्यार्थी आंदोलनाकडे सरकारचे दुर्लक्ष; लाठीमाराचा तीव्र निषेध, विद्यार्थ्यांच्या प्रश्नांवर तातडीने संवाद साधण्याची मागणी

देशभक्त असाल तर पेटून उठाल, अंधभक्त असाल तर डोळे मिटून बसाल”-माजी आमदार डॉ. बी. एस. पाटील यांचा सरकारवर घणाघात

जंतर-मंतरवरील विद्यार्थी आंदोलनाकडे सरकारचे दुर्लक्ष; लाठीमाराचा तीव्र निषेध, विद्यार्थ्यांच्या प्रश्नांवर तातडीने संवाद साधण्याची मागणी

अमळनेर प्रतिनिधी
दिल्लीतील जंतर-मंतर येथे गेल्या चार दिवसांपासून विविध विद्यार्थी प्रश्नांवर सुरू असलेल्या आंदोलनाकडे केंद्र सरकारने दुर्लक्ष केल्याचा आरोप करत महाविकास आघाडीचे नेते तथा माजी आमदार डॉ. बी. एस. पाटील यांनी केंद्र सरकारवर जोरदार टीका केली. विद्यार्थ्यांच्या आंदोलनावर झालेल्या लाठीमाराचा निषेध करत त्यांनी सरकारने तातडीने विद्यार्थ्यांशी संवाद साधून त्यांच्या मागण्यांवर निर्णय घ्यावा, अशी मागणी केली.

डॉ. पाटील म्हणाले, “देशभक्त असाल तर पेटून उठाल, अंधभक्त असाल तर डोळे मिटून बसाल.” विद्यार्थी आपल्या न्याय्य मागण्यांसाठी लोकशाही मार्गाने आंदोलन करत असताना सरकारकडून अपेक्षित प्रतिसाद मिळत नसल्याची खंत त्यांनी व्यक्त केली.
त्यांनी आरोप केला की, जंतर-मंतरवर हजारो विद्यार्थी आंदोलन करत असतानाही सरकारने त्यांच्या भावना आणि मागण्यांची पुरेशी दखल घेतलेली नाही. आंदोलन करणाऱ्या विद्यार्थ्यांवर झालेल्या लाठीमाराची घटना लोकशाहीला धक्का देणारी असून अशा पद्धतीने आवाज दडपण्याचा प्रयत्न योग्य नसल्याचे त्यांनी म्हटले.
डॉ. पाटील यांनी आपल्या भाषणात सरकारच्या कार्यपद्धतीवर टीका करत, सत्तेचा अहंकार कोणाचाही कायम टिकत नाही, असा उल्लेख केला. लोकशाही व्यवस्थेत विद्यार्थ्यांचे प्रश्न ऐकून घेणे आणि त्यावर सकारात्मक तोडगा काढणे ही सरकारची जबाबदारी असल्याचे त्यांनी सांगितले.
देशभरातील अनेक राज्ये, जिल्हे आणि तालुक्यांत विद्यार्थ्यांच्या समर्थनार्थ विविध स्वरूपातील आंदोलने होत असल्याचा उल्लेख करत त्यांनी सांगितले की, तरुणाईमध्ये वाढत असलेली नाराजी गांभीर्याने घेण्याची गरज आहे. विद्यार्थ्यांच्या शिक्षण, रोजगार आणि भवितव्याशी संबंधित प्रश्नांवर सरकारने संवेदनशील भूमिका घेतली पाहिजे, अशी अपेक्षाही त्यांनी व्यक्त केली.
महाविकास आघाडीच्या वतीने विद्यार्थ्यांवरील लाठीमाराचा तीव्र निषेध व्यक्त करत, आंदोलनकर्त्यांशी तातडीने संवाद साधावा आणि त्यांच्या मागण्यांवर सकारात्मक निर्णय घ्यावा, अशी मागणी डॉ. बी. एस. पाटील यांनी केली. त्यांनी लोकशाहीत मतभेद असू शकतात; मात्र संवाद हा त्यावरील सर्वोत्तम मार्ग असल्याचेही नमूद केले.
देशभरातील विविध विरोधी पक्षांनी या आंदोलनाला जाहीर पाठिंबा दर्शविला असून, जंतर-मंतर येथे अनेक विरोधी पक्षांचे वरिष्ठ नेते, पदाधिकारी आणि लोकप्रतिनिधींनी आंदोलनस्थळी भेट देत विद्यार्थ्यांशी संवाद साधला व त्यांच्या मागण्यांना समर्थन दिले. तसेच परदेशातील भारतीय विद्यार्थी संघटना आणि काही सामाजिक संघटनांनीही सामाजिक माध्यमांद्वारे आंदोलनाला पाठिंबा व्यक्त केल्याचा दावा आंदोलनकर्त्यांकडून करण्यात येत आहे. या पार्श्वभूमीवर विद्यार्थ्यांच्या प्रश्नांकडे सरकारने गांभीर्याने लक्ष देऊन तातडीने तोडगा काढावा, अशी मागणी विविध स्तरांतून होत आहे.