मोबाईल-टीव्हीपासून दूर, संस्कारांच्या वाटेवर! गजानन महाराज मंदिरात बालसंस्कार केंद्र सुरू

अमळनेर प्रतिनिधी :
आज दि. ६ सप्टेंबर, रविवार रोजी संत गजानन महाराज मंदिर येथे बालसंस्कार केंद्राचा शुभारंभ उत्साहपूर्ण आणि भक्तिमय वातावरणात करण्यात आला. गजानन परिवाराचे व पत्रकार ईश्वर महाजन सर यांच्या शुभहस्ते संत गजानन महाराज यांच्या प्रतिमेचे पूजन व माल्यार्पण करून या संस्कार केंद्राची सुरुवात झाली.
यावेळी संस्थेचे अध्यक्ष प्रा राजेंद्र पवार, संचालक प्रविण पवार, श्री. महेश साळुंखे, ज्येष्ठ मार्गदर्शक श्री. प्रा.जगताप सर, कपुरचंद बोरसे, श्री. रत्नपारखी सर, श्री. प्रदीप चौधरी यांच्यासह गजानन भक्त आणि बालगोपाळ मोठ्या संख्येने उपस्थित होते.

शिक्षणासोबत संस्कारांचीही गरज

आजच्या डिजिटल युगात लहान मुलांचा वाढता मोबाईल व टीव्हीचा वापर हा पालकांसाठी चिंतेचा विषय ठरत आहे. या पार्श्वभूमीवर मुलांना शिक्षणासोबतच नैतिक मूल्ये, संस्कार, शिस्त, सद्विचार आणि चांगल्या सवयी यांची शिदोरी मिळावी, या उद्देशाने बालसंस्कार केंद्र सुरू करण्यात आले आहे.
यावेळी संस्थेचे अध्यक्ष श्री. राजेंद्र पवार आणि गजानन भक्त श्री.प्रा. जगताप सर यांनी मार्गदर्शन करताना मुलांनी मोबाईल व टीव्हीपासून काही काळ दूर राहून बालसंस्कार केंद्रात नियमित उपस्थित राहावे, असे आवाहन केले. संस्कारांच्या माध्यमातून बालकांच्या व्यक्तिमत्त्वाला योग्य आकार मिळण्यास मदत होईल, असा विश्वास त्यांनी व्यक्त केला.

श्लोकांपासून महापुरुषांच्या कार्यापर्यंत संस्कारांचे धडे

बालसंस्कार केंद्राच्या माध्यमातून मुलांना विविध उपक्रमांच्या माध्यमातून आनंददायी पद्धतीने संस्कार दिले जाणार आहेत. यामध्ये श्लोक, सुभाषिते व त्यांचे अर्थ, सुविचार, संतांचे जीवनचरित्र व कथा, महापुरुषांचे कार्य, भजन, मंत्र, बोधकथा, बौद्धिक खेळ, गप्पागोष्टी आदींचा समावेश आहे.
या उपक्रमामुळे मुलांना केवळ पाठांतराची सवय लागणार नसून त्यांच्या विचारशक्तीला चालना मिळेल, नैतिक मूल्यांची जाणीव निर्माण होईल आणि चांगल्या संस्कारांची रुजवण होण्यास मदत होईल. बालपणात मिळालेले संस्कार आयुष्यभराची शिदोरी ठरतात, या भावनेतून केंद्राच्या माध्यमातून विविध उपक्रम राबविण्यात येणार आहेत.

दर रविवारी सकाळी १० ते ११ वाजता संस्कारवर्ग

बालसंस्कार केंद्राचे संचालक श्री. प्रदीप चौधरी सर यांनी सुजाण पालकांनी आपल्या पाल्यांना दर रविवारी सकाळी १० ते ११ या वेळेत बालसंस्कार केंद्रात पाठवावे, असे आवाहन केले आहे. मुलांच्या सर्वांगीण विकासासाठी पालकांनी या उपक्रमाला सहकार्य करावे, असेही त्यांनी सांगितले.
कार्यक्रमाच्या शेवटी श्री. महेश साळुंखे यांनी उपस्थितांचे आभार मानले. कार्यक्रमानंतर बालगोपाळांना खाऊचे वाटप करण्यात आले.

बालमनावर संस्कारांची पेरणी करून चांगला, सुसंस्कारी आणि विचारशील नागरिक घडविण्याच्या दिशेने संत गजानन महाराज मंदिरातील बालसंस्कार केंद्राची ही सुरुवात निश्चितच महत्त्वपूर्ण ठरणार आहे.