योगातून निरोगी जीवनाचा संदेश : ए. टी. झांबरे माध्यमिक विद्यालयात योग दिन उत्साहात*

*योगातून निरोगी जीवनाचा संदेश : ए. टी. झांबरे माध्यमिक विद्यालयात योग दिन उत्साहात*

जळगाव, दि. २० जून : के. सी. ई. सोसायटी संचलित ए. टी. झांबरे माध्यमिक विद्यालय, जळगाव येथे आंतरराष्ट्रीय योग दिनाच्या पूर्वसंध्येला योग दिन उत्साहपूर्ण वातावरणात साजरा करण्यात आला. यानिमित्त विद्यार्थ्यांसाठी विशेष योग प्रात्यक्षिक कार्यक्रमाचे आयोजन करण्यात आले होते. कार्यक्रमात विद्यार्थ्यांनी स्वतः विविध योगासने, प्राणायाम व ध्यान प्रकारांची प्रभावी प्रात्यक्षिके सादर करून उपस्थितांची दाद मिळविली.
कार्यक्रमाचे मार्गदर्शन श्री. किशोर भोई व श्रीमती निराशा सोनवणे यांनी केले. त्यांनी विद्यार्थ्यांकडून विविध योगासनांची प्रात्यक्षिके करून घेतली तसेच योगाचे शारीरिक, मानसिक व बौद्धिक आरोग्यासाठी असलेले महत्त्व विद्यार्थ्यांना समजावून सांगितले. नियमित योगाभ्यासामुळे शरीर सुदृढ राहते, मन प्रसन्न राहते, एकाग्रता वाढते तसेच तणावमुक्त जीवन जगण्यास मदत होते, असे त्यांनी विद्यार्थ्यांना सांगितले. योग हा केवळ व्यायामाचा प्रकार नसून निरोगी, संतुलित व सकारात्मक जीवन जगण्याची एक प्रभावी जीवनशैली आहे, असेही त्यांनी यावेळी नमूद केले.
या प्रसंगी शाळेच्या मुख्याध्यापिका श्रीमती प्रणिता झांबरे, ज्येष्ठ शिक्षिका श्रीमती प्रतिभा लोहार तसेच ज्येष्ठ शिक्षक श्री. निर्मल चतुर उपस्थित होते. मान्यवरांनी विद्यार्थ्यांच्या उत्स्फूर्त सहभागाचे कौतुक करून दैनंदिन जीवनात योगाचा अवलंब करण्याचे आवाहन केले.
कार्यक्रमासाठी आकर्षक व सुबक फलकलेखन श्री. निर्मल चतुर यांनी केले होते. त्यांच्या सुंदर फलकलेखनामुळे कार्यक्रमाची शोभा अधिक खुलून दिसत होती.
विद्यार्थ्यांच्या उत्साहपूर्ण सहभागामुळे संपूर्ण परिसर योगमय झाला होता. आंतरराष्ट्रीय योग दिनाच्या पूर्वसंध्येला आयोजित करण्यात आलेल्या या उपक्रमामुळे विद्यार्थ्यांमध्ये आरोग्य, शिस्त, आत्मविश्वास आणि सकारात्मक जीवनमूल्यांविषयी जागरूकता निर्माण झाली. कार्यक्रमाच्या यशस्वी आयोजनासाठी शिक्षक व शिक्षकेतर कर्मचाऱ्यांनी सहकार्य केले.