रिक्षाचालकाच्या मुलाची भरारी; अमळनेरच्या कल्पेश बाविस्कर झाले चार्टर्ड अकाउंटंट , प्रतिकूल परिस्थितीवर मात करत जिद्द-मेहनतीच्या बळावर स्वप्न साकार; तरुणांसाठी प्रेरणादायी यशोगाथा

रिक्षाचालकाच्या मुलाची भरारी; अमळनेरच्या कल्पेश बाविस्कर झाले चार्टर्ड अकाउंटंट

प्रतिकूल परिस्थितीवर मात करत जिद्द-मेहनतीच्या बळावर स्वप्न साकार; तरुणांसाठी प्रेरणादायी यशोगाथा

अमळनेर प्रतिनिधी

अमळनेर (जि. जळगाव) येथील कल्पेश दीपक बाविस्कर यांनी CA Final – जानेवारी 2026 परीक्षा उत्तीर्ण करून चार्टर्ड अकाउंटंट (CA) ही प्रतिष्ठेची पदवी मिळवली आहे. अत्यंत साध्या कुटुंबातून आलेल्या कल्पेश यांनी कठोर परिश्रम, चिकाटी आणि अढळ जिद्दीच्या बळावर हे यश संपादन केले असून त्यांच्या या यशामुळे अमळनेर परिसरात सर्वत्र आनंद आणि अभिमानाचे वातावरण निर्माण झाले आहे.

कल्पेश यांच्या कुटुंबात वडील, आई आणि तीन विवाहित बहिणी असा साधा परिवार आहे. वडील रिक्षा चालवून कुटुंबाचा उदरनिर्वाह करतात, तर आई गृहिणी आहे. दिवस-रात्र कष्ट करून वडिलांनी कुटुंबाची जबाबदारी सांभाळली आणि मुलांच्या शिक्षणासाठी नेहमीच प्रयत्न केले. घरची परिस्थिती मर्यादित असली तरी कुटुंबातील सर्वांनी शिक्षणाला प्राधान्य दिले.

लहानपणापासूनच कल्पेश यांना शिक्षणाची आवड होती आणि काहीतरी मोठे करण्याची जिद्द मनात होती. मात्र आर्थिक परिस्थितीमुळे शिक्षणाचा प्रवास सोपा नव्हता. अनेक अडचणी आणि आव्हाने समोर उभी राहिली; परंतु त्यांनी कधीही हार मानली नाही. उलट परिस्थितीला सामोरे जात त्यांनी स्वतःला अधिक सक्षम बनवण्याचा निर्धार केला.

उच्च शिक्षण सुरू ठेवण्यासाठी कल्पेश यांनी नोकरी करत अभ्यास करण्याचा निर्णय घेतला. दिवसभर काम आणि त्यानंतर अभ्यास असा कठीण दिनक्रम त्यांनी स्वीकारला. नोकरीतून मिळणाऱ्या उत्पन्नातूनच त्यांनी CA Final ची परीक्षा फी तसेच क्लासेसची फी भरली. मर्यादित साधनसामग्री असूनही त्यांनी आपले ध्येय डोळ्यासमोर ठेवून सातत्याने मेहनत घेतली.

या संपूर्ण प्रवासात त्यांना सीए हेमराज जाधव, सीए पदमसिंह पाटील, सीए काबरा सर आणि एम. बी. जवर सर यांचे मोलाचे मार्गदर्शन लाभले. त्यांच्या मार्गदर्शनामुळे कल्पेश यांना योग्य दिशा मिळाली आणि कठोर परिश्रमाला यशाची जोड मिळाली.

पानखिडकी, पाटीलवाडा, अमळनेर येथील रहिवासी असलेल्या कल्पेश बाविस्कर यांची ही यशोगाथा आज अनेक विद्यार्थ्यांसाठी प्रेरणादायी ठरत आहे. प्रतिकूल परिस्थितीतही शिक्षणाच्या जोरावर जीवनात मोठे यश मिळवता येते, याचे हे उत्तम उदाहरण ठरले आहे.

यशाबद्दल बोलताना कल्पेश बाविस्कर म्हणाले की, “परिस्थिती कितीही कठीण असली तरी मेहनत, संयम आणि जिद्द असेल तर कोणतेही स्वप्न पूर्ण करता येते. कुटुंबाचा पाठिंबा आणि गुरुजनांचे मार्गदर्शन यामुळेच आज हे यश मिळवणे शक्य झाले.”

त्यांच्या या यशामुळे केवळ त्यांच्या कुटुंबालाच नव्हे तर संपूर्ण अमळनेर शहराला अभिमान वाटत आहे. संघर्षातून उभे राहून स्वप्न साकार करणाऱ्या या तरुणाची यशोगाथा अनेकांसाठी प्रेरणादायी ठरत आहे.