आदिशक्तीच्या आराधनेचा आजपासून मंगलारंभ! श्री मंगळग्रह मंदिरात सकाळी घटस्थापना; उद्यापासून श्रीयंत्र व भौमयंत्रावर अर्चन

आदिशक्तीच्या आराधनेचा आजपासून मंगलारंभ!

श्री मंगळग्रह मंदिरात सकाळी घटस्थापना; उद्यापासून श्रीयंत्र व भौमयंत्रावर अर्चन

अमळनेर प्रतिनिधी : विश्वातील एकमात्र अतिप्राचीन, अतिदुर्मिळ व अतिजागृत असलेल्या येथील श्री मंगळग्रह मंदिरात दरवर्षीप्रमाणे यंदाही आदिशक्तीच्या आराधनेचा मंगलारंभ अर्थात नवरात्रोत्सवाला रविवार, दि. 11 ऑक्टोबर 2026 रोजी घटस्थापनेने सुरूवात होत आहे. अत्यंत उत्साहात आणि धार्मिक वातावरणात सुरूवात होणाऱ्या या पर्वात आध्यात्मिक चैतन्य, भक्ती आणि शक्तिउपासनेचा जागर तसेच विविध धार्मिक कार्यक्रम होणार आहेत. मंगळग्रह सेवा संस्थेचे अध्यक्ष डॉ. डिगंबर महाले यांच्या मार्गदर्शनाने दरवर्षी हा उत्सव श्री मंगळग्रह मंदिरात आयोजित केला जातो.

यंदा आश्विन शुद्ध प्रतिपदा अर्थात मंगळ होरा या शुभ मुहूर्तावर श्री मंगळग्रह मंदिर परिसरातील त्रिशुलात्मकस्थित भगवान श्री कालभैरव व माता श्री भैरवी यांच्या मंदिरासमोर विधिवत घटस्थापना होऊन देवीच्या नऊ रूपांचे पूजन केले जाणार आहे. यंदा तिथीच्या वृद्धीमुळे नवरात्रोत्सव दहा दिवसांचा असणार आहे. मंगळवार, दि. 20 ऑक्टोबर 2026 रोजी विजयादशमीने या उत्सवाची सांगता होईल.

दरम्यान, दहा दिवस चालणाऱ्या या धार्मिक विधींच्या काळात अमळनेरसह परिसरातील भाविकांनी मोठ्या संख्येने उपस्थिती द्यावी, असे आवाहन मंगळग्रह सेवा संस्थेच्या विश्वस्त मंडळातर्फे करण्यात आले आहे.

आज होणार घटस्थापना

रविवार, दि. 11 ऑक्टोबर 2026 रोजी श्री मंगळग्रह मंदिर परिसरातील त्रिशुलात्मक भगवान श्री कालभैरव व माता श्री भैरवी यांचे मंदिर अत्यंत कलात्मकरित्या सजविण्यात आले आहे. तेथे सकाळी 9.30 वाजता विधिवत घटस्थापना होईल. घटस्थापना म्हणजे केवळ मातीच्या पात्रात धान्य पेरून कलशाची प्रतिष्ठापना करणे नव्हे, तर सृष्टीतील चैतन्यशक्तीचे आवाहन करण्याची आधात्मिक प्रक्रिया मानली जाते. कलश हा मांगल्य, समृद्धी आणि जीवनाच्या अखंड प्रवाहाचे प्रतीक आहे. त्यासमोर प्रज्वलित केलेली अखंड ज्योत श्रद्धेचा, ज्ञानाचा आणि अंतर्मनातील अज्ञान दूर करणाऱ्या प्रकाशाचा संदेश देते.

उद्यापासून दररोज श्रीयंत्र व भौमयंत्रावर अर्चन

सोमवार, दि. 12 ऑक्टोबर ते रविवार, 18 ऑक्टोबर 2026 दरम्यान दररोज सकाळी 10 ते दुपारी 12.30 या वेळेत विशेष यजमानांच्या हस्ते श्रीयंत्र व भौमयंत्रावर अर्चन होईल. तसेच अमळनेर शहरातील महिला मंडळांतील माता-भगिनींच्या शुभ हस्ते सायंकाळी 6.30 वाजता सामूहिक आरती होईल.

19 ऑक्टोबर 2026 रोजी नवचंडी यज्ञ

सोमवार, दि. 19 ऑक्टोबर 2026 रोजी दोन सत्रांत नवचंडी यज्ञाचे आयोजन करण्यात आले आहे. प्रथम सत्र सकाळी 9 ते दुपारी 12 व द्वितीय सत्र दुपारी 2 ते सायंकाळी 5 वाजेदरम्यान असेल. या काळात विशेष यजमानांच्या शुभ हस्ते विधिवत नवचंडी यज्ञ होऊन सायंकाळी पूर्णाहुती होईल.