दतकला’मध्ये विद्यार्थ्यांच्या जीवाशी खेळ आरटीओकडून कारवाईचा बडगा, पालकांमध्ये प्रचंड खळबळ दतकलाच्या अनेक बसवर गंभीर कारवाई,

‘सोलापूर प्रतिनिधी

: विद्यार्थ्यांच्या सुरक्षिततेची जबाबदारी ज्यांच्यावर, त्यांच्याच निष्काळजीपणामुळे विद्यार्थ्यांचा जीव धोक्यात येत असेल, तर यापेक्षा गंभीर बाब कोणती? शिक्षणाच्या मंदिरात भविष्य घडवण्यासाठी येणाऱ्या मुलांच्या प्रवासाची साधी सुरक्षितताही जपली जात नसेल, तर संस्थेच्या कारभारावर प्रश्नचिन्ह उभे राहणे स्वाभाविक आहे. सोलापूर जिल्ह्यातील केतूर येथील दतकला महाविद्यालयाच्या विद्यार्थ्यांची वाहतूक करणाऱ्या स्कूल बसच्या तपासणीत कागदपत्रांची मुदत संपल्याचे समोर आले असून, अनेक बसवर आरटीओने कारवाई केली आहे. नियम धाब्यावर, विद्यार्थ्यांचा जीव धोक्यात आणि पालकांच्या काळजाचा ठोका चुकवणारी ही बाब शिक्षणसंस्थांच्या जबाबदारीवरच गंभीर प्रश्न उपस्थित करणारी आहे. उपप्रादेशिक परिवहन विभागाकडून दतकला महाविद्यालयाला अचानक भेट देऊन बसची तपासणी करण्यात आली. या तपासणीदरम्यान विद्यार्थ्यांची ये-जा करण्यासाठी वापरण्यात येणाऱ्या अनेक स्कूल बसच्या कागदपत्रांची मुदत संपलेली असल्याचे निष्पन्न झाले.

दरम्यान, कागदपत्रांची मुदत संपलेली असतानाही विद्यार्थ्यांना असुरक्षितरीत्या घेऊन प्रवास करणाऱ्या अनेक बस प्रत्यक्ष महाविद्यालयाच्या मार्गावर धावताना आढळून आल्या.

या बस ‘दतकला विद्यालय, इंदापूर’ येथे चालवल्या जात असल्याची माहिती प्राचार्यांनी अधिकाऱ्यांना दिली. विद्यार्थ्यांच्या सुरक्षेकडे निष्काळजीपणा करणाऱ्या संस्थेवर आता वाहतूक विभाग आणखी कडक कारवाई करणार का, याकडे पालकांचे लक्ष लागले आहे.

भोंदूबाबा मनोहर भोसले यांच्या प्रकरणात दतकला शिक्षण संस्थेच्या प्रमुखांचा समावेश असल्याची बाब समोर आल्यानंतर दतकल शिक्षण संस्थेवर आता वेगवेगळ्या विभागांकडून कारवाई होण्यास सुरुवात झाली आहे. पोलिसांनी कारवाई केल्यानंतर आता आरटीओने गाड्यांवर कारवाई केली आहे.

संदीप म्हेत्रे, सहायक उपप्रादेशिक परिवहन अधिकारी, अकलूज यांनी सांगितले की,कारवाईनंतर आमच्या पथकाने दतकला महाविद्यालयाचे मुख्याध्यापक मार्कंड यांची भेट घेऊन सुरक्षेसंदर्भात माहिती दिली आहे. स्कूल बसची सर्व आवश्यक कागदपत्रे व पासिंग तात्काळ अद्ययावत करूनच मुलांची सुरक्षित वाहतूक करावी, अन्यथा बस रस्त्यावर धावू दिल्या जाणार नाहीत,असे सांगण्यात आले आहे.

विद्यार्थ्यांचा जीव हा कोणत्याही संस्थेच्या प्रतिष्ठेपेक्षा, व्यवस्थापनाच्या सोयीपेक्षा आणि आर्थिक गणितापेक्षा कितीतरी मोलाचा आहे. स्कूल बसची कागदपत्रे, परवाने आणि आवश्यक तांत्रिक तपासण्या या केवळ सरकारी नियमांची पूर्तता करणाऱ्या बाबी नाहीत, तर प्रत्येक विद्यार्थ्याच्या सुरक्षिततेची हमी आहेत. तीन बसवर कारवाई झाली म्हणजे प्रश्न संपला, असे समजून चालणार नाही. संबंधित सर्व वाहनांची सखोल तपासणी, नियमांचे उल्लंघन करणाऱ्यांची जबाबदारी निश्चित करणे आणि भविष्यात अशी परिस्थिती पुन्हा उद्भवणार नाही, याची ठोस व्यवस्था करणे आवश्यक आहे. आरटीओचा कारवाईचा बडगा केवळ कागदपत्रांपुरता मर्यादित राहणार की विद्यार्थ्यांच्या सुरक्षिततेशी तडजोड करणाऱ्या संपूर्ण व्यवस्थेची जबाबदारी निश्चित होणार? हा खरा प्रश्न आहे. कारण, निष्काळजीपणामुळे एखाद्या निष्पाप विद्यार्थ्याच्या जीवावर बेतल्यानंतर कारवाई करून काहीच उपयोग नसतो. अपघात होण्याआधी जागे होणे, हीच प्रशासनाची आणि शिक्षणसंस्थांची खरी कसोटी आहे.