पुणे शिक्षक मतदारसंघातून डॉ. प्रशम कोल्हे यांना उमेदवारी द्यावी – अनिल बोरनारे यांची पक्ष नेतृत्वाकडे मागणी

मुंबई (प्रतिनिधी) – आगामी पुणे शिक्षक मतदारसंघ निवडणुकीसाठी भारतीय जनता पक्षाने शिक्षकांच्या प्रश्नांवर सातत्याने आणि प्रभावीपणे काम करणारे भाजप शिक्षक प्रकोष्ठाचे राज्य संयोजक डॉ. प्रशम कोल्हे यांना उमेदवारी द्यावी, अशी जोरदार मागणी शिक्षक महासंघाचे राज्याध्यक्ष तसेच भाजपाचे प्रदेश निमंत्रित सदस्य अनिल बोरनारे यांनी पक्ष नेतृत्वाकडे केली आहे.

या संदर्भात अनिल बोरनारे यांनी नुकतीच मुंबई येथे आयोजित एका कार्यक्रमादरम्यान महाराष्ट्राचे मुख्यमंत्री मा. देवेंद्र फडणवीस यांची भेट घेऊन डॉ. प्रशम कोल्हे यांच्या उमेदवारीबाबत सकारात्मक भूमिका घेण्याची विनंती केली. तसेच भाजपाचे प्रदेशाध्यक्ष मा. रवींद्र चव्हाण यांची भेट घेऊनही डॉ. कोल्हे यांना उमेदवारी देण्याची मागणी करणार असल्याचे त्यांनी सांगितले.

अनिल बोरनारे म्हणाले की, पुणे विभागातील पुणे, सातारा, सांगली, सोलापूर आणि कोल्हापूर या पाचही जिल्ह्यांमध्ये डॉ. प्रशम कोल्हे यांनी शिक्षक, शिक्षकेतर कर्मचारी आणि शिक्षण क्षेत्राशी संबंधित विविध घटकांचे प्रश्न सोडवण्यासाठी उल्लेखनीय कार्य केले आहे. शिक्षकांच्या सेवाविषयक अडचणी, भरती प्रक्रिया, पदोन्नती, अनुदान, शैक्षणिक धोरणे तसेच विविध प्रशासकीय प्रश्नांबाबत त्यांनी सातत्याने पाठपुरावा करून अनेकांना न्याय मिळवून दिला आहे.

शिक्षक संघटनांमध्ये सक्रिय सहभाग, शासन व प्रशासनाशी प्रभावी संवाद आणि शिक्षकांच्या हितासाठी सातत्यपूर्ण संघर्ष यामुळे डॉ. प्रशम कोल्हे यांनी पुणे विभागात विश्वासार्ह नेतृत्व निर्माण केले आहे. त्यामुळे शिक्षक मतदारसंघाचे प्रतिनिधित्व करण्यासाठी ते अत्यंत सक्षम आणि योग्य उमेदवार असल्याचे मत बोरनारे यांनी व्यक्त केले.

पुणे शिक्षक मतदारसंघातील शिक्षकांमध्ये डॉ. कोल्हे यांच्याविषयी सकारात्मक वातावरण असून त्यांच्या उमेदवारीमुळे भारतीय जनता पक्षाला मोठा लाभ होईल, असा विश्वासही त्यांनी व्यक्त केला. शिक्षण क्षेत्रातील प्रत्यक्ष अनुभव, शिक्षकांच्या प्रश्नांची सखोल जाण आणि संघटनात्मक कौशल्य यामुळे डॉ. कोल्हे यांना उमेदवारी दिल्यास शिक्षक वर्गाला प्रभावी नेतृत्व मिळेल, असे बोरनारे यांनी नमूद केले.

शिक्षक महासंघाच्या वतीने राज्यभरातील शिक्षकांच्या अपेक्षा आणि भावना पक्ष नेतृत्वापर्यंत पोहोचविण्यात येत असून, पुणे शिक्षक मतदारसंघासाठी डॉ. प्रशम कोल्हे यांच्या नावाचा गांभीर्याने विचार करण्यात यावा, अशी मागणी त्यांनी पुन्हा एकदा केली आहे.