शाडू मातीच्या गणेशमूर्तीला प्रथम क्रमांक; जयेश हडपचा गौरव!

जयनील फाउंडेशनच्या तालुकास्तरीय पर्यावरणपूरक गणेशोत्सव स्पर्धेत न्यू व्हिजन स्कूलची बाजी

अमळनेर प्रतिनिधी : पर्यावरणपूरक गणेशोत्सवाला प्रोत्साहन देण्यासाठी जयनील फाउंडेशन, अमळनेर यांच्या वतीने आयोजित करण्यात आलेल्या भव्य तालुकास्तरीय शाडू माती गणपती स्पर्धेत न्यू व्हिजन स्कूलच्या विद्यार्थ्याने प्रथम क्रमांक पटकावून शाळेच्या शिरपेचात मानाचा तुरा रोवला.
न्यू व्हिजन स्कूलचा विद्यार्थी जयेश धनंजय हडप याने शाडू मातीपासून साकारलेल्या गणेशमूर्तीला या स्पर्धेत प्रथम क्रमांक मिळाला. त्याला ट्रॉफी व रोख ३ हजार रुपयांचे पारितोषिक देऊन गौरविण्यात आले.

शाळेतर्फे जयेशचा सत्कार

जयेशच्या या उल्लेखनीय यशाबद्दल न्यू व्हिजन स्कूलच्या वतीने त्याचा विशेष सत्कार करण्यात आला. शाळेचे चेअरमन श्री. निलेश लांडगे सर यांच्या हस्ते जयेशचा गौरव करण्यात आला. यावेळी संस्थेच्या अध्यक्ष शितल देशमुख, शाळेच्या प्राचार्या सौ. सुमित्रा झांझोटे, उपप्राचार्या सौ. दिपाली राजपूत तसेच सर्व शिक्षकवृंद उपस्थित होते.
शाळेतील शिक्षकांनी जयेशचे अभिनंदन करून त्याच्या कलागुणांना आणि पर्यावरणपूरक दृष्टिकोनाला दाद दिली.

२०१५ पासून पर्यावरणपूरक गणेशोत्सवाचा उपक्रम

न्यू व्हिजन स्कूल ही उपक्रमशील शाळा म्हणून ओळखली जाते. विद्यार्थ्यांमध्ये पर्यावरणाबाबत जागरूकता निर्माण करण्यासाठी शाळेच्या माध्यमातून विविध नाविन्यपूर्ण उपक्रम सातत्याने राबविले जातात.
याच उपक्रमाचा एक भाग म्हणून सन २०१५ पासून दरवर्षी शाडू मातीपासून गणेशमूर्ती तयार करण्याची कार्यशाळा नियमितपणे आयोजित केली जाते. या कार्यशाळेत विद्यार्थी स्वतःच्या हाताने गणरायाच्या मूर्ती साकारतात. त्यानंतर या गणेशमूर्तीची शाळेत विधिवत स्थापना केली जाते.

विसर्जनातूनही पर्यावरण संवर्धनाचा संदेश

न्यू व्हिजन स्कूलच्या पर्यावरणपूरक गणेशोत्सवाचे वैशिष्ट्य म्हणजे गणेश विसर्जनाची अनोखी पद्धत. गणरायाचे विसर्जन करताना मोठ्या पिंपामध्ये फुलांच्या पाकळ्या ठेवून पर्यावरणपूरक पद्धतीने विसर्जन केले जाते. विसर्जनानंतर उरलेल्या शाडू मातीचा उपयोग वृक्षारोपणासाठी केला जातो.
अशा प्रकारे गणेशोत्सवाच्या माध्यमातून विद्यार्थ्यांना ‘परंपरेसोबत पर्यावरणाचे रक्षण’ करण्याचा मौलिक संदेश दिला जातो. शाडू मातीचा वापर, पर्यावरणपूरक विसर्जन आणि उर्वरित मातीपासून वृक्षारोपण हा उपक्रम विद्यार्थ्यांच्या मनात निसर्ग संवर्धनाची भावना रुजविणारा ठरत आहे.
जयेश हडप याने मिळविलेल्या प्रथम क्रमांकामुळे या पर्यावरणपूरक उपक्रमाला आणखी प्रोत्साहन मिळाले असून, विद्यार्थ्यांच्या कलागुणांसोबतच पर्यावरण संवर्धनाची जाणीव निर्माण करण्यासाठी न्यू व्हिजन स्कूलचा हा उपक्रम प्रेरणादायी ठरत आहे.