वाढदिवस विशेष,संघर्षातून उभा राहिलेला वटवृक्ष : तात्यासाहेब विलासराव पाटील

संघर्षातून उभा राहिलेला वटवृक्ष : तात्यासाहेब विलासराव पाटील

देवगांव-देवळी या मातीत जन्मलेले, कर्तृत्वाने संपूर्ण महाराष्ट्राला दिशा देणारे आणि आपल्या कार्याने समाजमनात घर करणारे व्यक्तिमत्त्व म्हणजे महात्मा ज्योतिराव फुले हायस्कूलचे अध्यक्ष आदरणीय तात्यासाहेब श्री. विलासराव शांताराम पाटील सर. त्यांच्या ६२ व्या वाढदिवसानिमित्त त्यांच्या जीवनप्रवासाचा आणि कार्याचा गौरव करताना मन अभिमानाने भरून येते.
तात्यासाहेबांचे आयुष्य हे सहजसोप्या वाटेने चाललेले नसून संघर्षाच्या कठीण वळणांवर घडलेले आहे. ग्रामीण भागात प्राथमिक व माध्यमिक शिक्षण घेत असताना त्यांनी विद्यार्थी चळवळीत सक्रिय सहभाग घेतला. याच काळात त्यांच्या अंगी नेतृत्वगुणांची बीजे रुजली आणि पुढे ती भव्य वटवृक्षात रूपांतरित झाली.
महाविद्यालयीन शिक्षण पूर्ण केल्यानंतर त्यांनी महानगरपालिका धुळे येथे माध्यमिक शिक्षक म्हणून सेवेला सुरुवात केली. आपल्या कर्तृत्व, प्रामाणिकपणा आणि संघटन कौशल्याच्या बळावर त्यांनी मुख्याध्यापक पदाची जबाबदारीही यशस्वीरित्या सांभाळली. मात्र, नोकरी करत असतानाही त्यांच्या मनात समाजासाठी काहीतरी मोठं करण्याची ज्वाला कायम पेटलेली होती.
याच काळात त्यांचे वडील आदरणीय शांताराम बापू (एस. एल. पाटील सर) यांनी गावातील विद्यार्थ्यांच्या शिक्षणाविषयीची खंत त्यांच्या समोर मांडली. गावात माध्यमिक शिक्षणाची सोय नसल्याने अनेक विद्यार्थी शिक्षण अर्धवट सोडत होते. या वेदनेतून तात्यासाहेबांनी एक ठाम निर्धार केला — “आपल्या गावात माध्यमिक शाळा उभारायचीच!” आणि त्या निर्धाराला कृतीची जोड देत त्यांनी शाळेची स्थापना केली.
सुरुवातीच्या काळात अत्यंत प्रतिकूल परिस्थितीत, मर्यादित साधनसामग्रीत आणि असंख्य अडचणींना सामोरे जात त्यांनी शाळा उभी केली. एका छोट्याशा खोलीत सुरू झालेली ही शाळा आज भव्य वटवृक्ष बनून हजारो विद्यार्थ्यांच्या आयुष्याला दिशा देत आहे. ही केवळ शाळा नसून तात्यासाहेबांच्या जिद्दीचा आणि समाजाप्रती असलेल्या बांधिलकीचा जिवंत पुरावा आहे.
तात्यासाहेबांनी केवळ शिक्षण क्षेत्रातच नव्हे, तर सामाजिक क्षेत्रातही आपला ठसा उमटवला आहे. विविध पदांवर काम करताना त्यांनी समाजाच्या सर्वांगीण विकासासाठी सातत्याने प्रयत्न केले. त्यांच्या कार्याची दखल घेऊन आज त्यांची ओळख केवळ महाराष्ट्रापुरती मर्यादित नसून देशभर पसरली आहे. अखिल भारतीय महाराष्ट्र माळी संघाचे राष्ट्रीय अध्यक्ष म्हणून ते समाजहितासाठी अहोरात्र कार्यरत आहेत.
विशेष म्हणजे, ६२ व्या वर्षातही त्यांच्या कार्यातील ऊर्जा, उत्साह आणि जिद्द तितकीच तरुण आहे. समाजातील प्रत्येक घटक पुढे यावा, सर्व समाज प्रगतीच्या मार्गावर यावा, यासाठी ते आजही तितक्याच तळमळीने झटत आहेत.
तात्यासाहेबांचे व्यक्तिमत्त्व घडवण्यात त्यांच्या वडिलांचे संस्कार महत्त्वाचे ठरले. शांताराम बापू यांनी दिलेल्या मूल्यांची शिदोरी आजही तात्यासाहेबांच्या प्रत्येक कृतीत दिसून येते. त्यांच्या कार्यातून संस्कार, संवेदना आणि समाजसेवेची परंपरा जपली जात आहे.
खरंच, तात्यासाहेब हे देवगांव-देवळी गावाचे अनमोल रत्न आहेत. त्यांच्या कर्तृत्वामुळे गावाची ओळख राज्यभर आणि देशभर पोहोचली आहे. त्यांच्या कार्याचा गौरव कितीही केला तरी तो अपुरा वाटतो.
तात्यासाहेब विलासराव शांताराम पाटील सर यांना त्यांच्या वाढदिवसानिमित्त हार्दिक शुभेच्छा! त्यांचे पुढील आयुष्य निरोगी, आनंदी आणि अधिक कार्यमय जावो, त्यांच्या हातून समाजाची अधिकाधिक सेवा घडो, हीच परमेश्वर चरणी प्रार्थना.

शुभेच्छुक :
श्री. विश्वास हिंमतराव पाटील (देवगांव-देवळी)
पदवीधर शिक्षक, जि.प. उच्च प्राथमिक शाळा सडावण बु. ता. अमळनेर