ज्ञानदीपाचा तेजोत्सव : देवगाव देवळीतील महात्मा फुले विद्यालयात वार्षिक पारितोषिक वितरण व दहावीचा भावनिक निरोप समारंभ संपन्न संस्कार, कर्तृत्व आणि स्वप्नांची उंच भरारी यांचा प्रेरणादायी संगम

ज्ञानदीपाचा तेजोत्सव : देवगाव देवळीतील महात्मा फुले विद्यालयात वार्षिक पारितोषिक वितरण व दहावीचा भावनिक निरोप समारंभ संपन्न

संस्कार, कर्तृत्व आणि स्वप्नांची उंच भरारी यांचा प्रेरणादायी संगम

अमळनेर प्रतिनिधी :
देवगाव देवळी येथील महात्मा ज्योतिराव फुले हायस्कूलमध्ये वार्षिक पारितोषिक वितरण समारंभ व इयत्ता दहावीच्या विद्यार्थ्यांचा निरोप समारंभ अत्यंत उत्साहपूर्ण आणि भावनिक वातावरणात पार पडला. विद्यार्थ्यांच्या कर्तृत्वाचा गौरव आणि उज्ज्वल भवितव्याच्या शुभेच्छांनी भारलेला हा सोहळा गावासाठी एक अभिमानाचा क्षण ठरला.
कार्यक्रमाच्या अध्यक्षस्थानी संस्थेचे अध्यक्ष मा. विलासराव पाटील होते. प्रमुख अतिथी म्हणून धनदाई महाविद्यालयाचे प्राचार्य डॉ. एच. एम. पाटील उपस्थित होते, तर सेवानिवृत्त अभियंता, जिल्हा परिषद धुळेचे सुरेश कौतिक महाजन यांचीही विशेष उपस्थिती लाभली.

सावित्रीबाईंच्या प्रेरणेने कार्यक्रमाची मंगल सुरुवात
कार्यक्रमाची सुरुवात क्रांतीज्योती सावित्रीबाई फुले यांच्या प्रतिमेचे पूजन व माल्यार्पण करून करण्यात आली. त्यानंतर विचारपीठावरील सर्व मान्यवरांचा शाल व पुष्पगुच्छ देऊन मुख्याध्यापक व शिक्षकवृंदांनी सत्कार केला.
शाळेचे मुख्याध्यापक अनिल महाजन यांनी प्रस्ताविकामध्ये वर्षभरात राबविण्यात आलेल्या विविध शैक्षणिक, क्रीडा व सांस्कृतिक उपक्रमांचा आढावा घेत विद्यार्थ्यांच्या यशस्वी वाटचालीचा गौरव केला.

दहावीच्या विद्यार्थ्यांचे मनोगत : आठवणींचा गहिवर

इयत्ता दहावीतील वैष्णवी भरत पाटील, वैष्णवी श्याम पाटील, गिरीजा माळी, शुभांगी पाटील, नूतन पाटील आणि क्रिश पाटील यांनी शाळेतील आठवणी, शिक्षकांचे मार्गदर्शन आणि मित्रमैत्रिणींचे सहकार्य यांविषयी कृतज्ञता व्यक्त केली. त्यांच्या शब्दांतून शाळेबद्दलची आत्मीयता आणि भविष्यासाठीची उमेद स्पष्टपणे जाणवत होती.

गुणवंत विद्यार्थ्यांचा गौरव

मार्च २०२५ मध्ये प्रथम क्रमांक पटकावणाऱ्या सोनाली महाजन हिला मान्यवरांच्या हस्ते रोख बक्षीस देऊन गौरविण्यात आले.
पंतप्रधान नरेंद्र मोदी यांच्या जयंतीनिमित्त आयोजित निबंध स्पर्धेत अमळनेर भाजप शहराध्यक्ष योगेश महाजन यांच्या तर्फे पाच विद्यार्थ्यांना स्मृतीचिन्हे देऊन सन्मानित करण्यात आले.
राष्ट्रभाषा विकास परिषद, पुणे यांच्या माध्यमातून घेण्यात आलेल्या सामान्य ज्ञान स्पर्धेत हिंदी शिक्षक आय. आर. महाजन यांनी पुढाकार घेतला. शाळेतील ‘राजभाषा प्रतिभा पुरस्कार’ प्रथम गिरीजा सुनील माळी हिला मेडल, प्रमाणपत्र व पुस्तक देऊन प्रदान करण्यात आला. तसेच ४० विद्यार्थ्यांना सहभाग प्रमाणपत्र व पुस्तके देण्यात आली.
हिंदी अध्यापक मंडळ व युनियन बँक यांच्या संयुक्त विद्यमाने झालेल्या तालुकास्तरीय निबंध स्पर्धेत प्रथम क्रमांक पटकावणाऱ्या अर्पिता प्रवीण बोरसे हिला सन्मानित करण्यात आले.
राष्ट्रीय मतदार दिनानिमित्त महसूल विभागामार्फत घेण्यात आलेल्या निबंध स्पर्धेत शाळेतील तीन विद्यार्थिनींना प्रमाणपत्र देऊन गौरविण्यात आले.

दहावीच्या विद्यार्थ्यांची शाळेला प्रेमाची भेट

इयत्ता दहावीतील विद्यार्थ्यांनी शाळेला प्रतिमा भेट देऊन आपली कृतज्ञता व्यक्त केली. वर्गशिक्षक आय. आर. महाजन व मान्यवरांनी सर्व विद्यार्थ्यांचे अभिनंदन करत त्यांच्या भावी वाटचालीस शुभेच्छा दिल्या.

प्रमुख अतिथी डॉ. एच. एम. पाटील यांचे प्रेरणादायी मार्गदर्शन
आपल्या भाषणात डॉ. पाटील म्हणाले,
“देवगाव देवळी या गावात कै. बापूसाहेब एस. एल. पाटील यांनी ज्ञानाचे रोपटे लावले, त्याचे आज वटवृक्षात रूपांतर झाले आहे. या शाळेतून शिक्षण घेऊन अनेक विद्यार्थी विविध क्षेत्रांत कार्यरत आहेत, ही अभिमानाची बाब आहे.”
विद्यार्थ्यांना मार्गदर्शन करताना त्यांनी सांगितले की,
“अगोदर स्वतःला ओळखा. आपल्या क्षमतांचा शोध घ्या. स्वतंत्र विचार करा. छंद आणि आवड ओळखल्याशिवाय योग्य दिशा मिळत नाही. ज्ञानासोबत आरोग्याचीही काळजी घ्या. प्रत्येकाने स्वतःच्या शरीराचा डॉक्टर व्हायला हवे. वेळेचे नियोजन करा आणि येणाऱ्या परीक्षेत शाळेचे व गावाचे नाव उज्ज्वल करा.”
त्यांच्या शब्दांतून आत्मविश्वास, स्वावलंबन आणि नियोजनाचे महत्त्व स्पष्टपणे अधोरेखित झाले.
अध्यक्षीय भाषण : विलासराव पाटील यांचे संस्कारमूल्यांवर भाष्य
अध्यक्षीय भाषणात मा. विलासराव पाटील म्हणाले,
“देवगाव देवळीमध्ये अनेक विद्याविभूषित व्यक्ती आहेत. विद्यार्थ्यांनी त्यांचे मार्गदर्शन घ्यावे. गाव, शाळा आणि घरातील संस्कारच पुढील आयुष्यात आपली ओळख घडवतात.”
ते पुढे म्हणाले,
“जीवनातील प्रत्येक परीक्षा महत्त्वाची असते. शिक्षकांच्या आज्ञेचे पालन करा. व्यवहारज्ञान हे तत्त्वज्ञानाचे वास्तव रूप आहे. शिक्षणासोबत चारित्र्य आणि मूल्येही जोपासली पाहिजेत.”
यावेळी त्यांनी सत्यजित तांबे, पदवीधर आमदार यांनी शाळेला दिलेल्या डिजिटल पेडियमबद्दल आभार व अभिनंदन व्यक्त केले.
कार्यक्रमाचे सूत्रसंचालन सांस्कृतिक विभाग प्रमुख आय. आर. महाजन यांनी केले. आभार प्रदर्शन एस. के. महाजन यांनी मानले. कार्यक्रमाच्या यशस्वीतेसाठी एच. ओ. माळी, शिक्षकेतर कर्मचारी देवेश पाटील, संभाजी पाटील, गुरुदास पाटील यांनी विशेष परिश्रम घेतले.
विद्यार्थी, पालक व ग्रामस्थांच्या मोठ्या उपस्थितीत हा प्रेरणादायी सोहळा उत्साहात संपन्न झाला.