अमळनेरमध्ये महाराष्ट्र टीचर्स असोसिएशनची नवी दमदार नेतृत्व नियुक्ती — संघटना बळकटीस नवी ऊर्जा

अमळनेरमध्ये महाराष्ट्र टीचर्स असोसिएशनची नवी दमदार नेतृत्व नियुक्ती — संघटना बळकटीस नवी ऊर्जा

अमळनेर प्रतिनिधी –
महाराष्ट्र टीचर्स असोसिएशन, अमळनेर शाखेच्या जिल्हा परिषद विभागात नवीन नेतृत्वाची निवड नुकतीच अत्यंत उत्साहात व पारदर्शक प्रक्रियेत करण्यात आली. संघटना अधिक बळकट व्हावी, सदस्यांच्या समस्या तातडीने सोडवल्या जाव्यात आणि जिल्हा परिषद शिक्षकांना अधिक सक्षम मार्गदर्शन मिळावे, या उद्देशाने नवनियुक्त पदाधिकाऱ्यांची निवड संघटनेतर्फे करण्यात आली आहे.

या निवडीमध्ये जिल्हा परिषद विभाग कार्याध्यक्षपदी श्री. सुधीर चौधरी सर यांची तर तालुकाध्यक्षपदी श्री. किरण गजानन मारवडकर सर यांची नियुक्ती करण्यात आली. या दोन्ही नेत्यांनी शिक्षकांच्या हितासाठी सातत्याने केलेल्या कामाची दखल घेऊन त्यांच्यावर ही महत्त्वाची जबाबदारी सोपविण्यात आली आहे.

नियुक्तीपत्र प्रदान करण्यासाठी आयोजित छोटेखानी कार्यक्रमात जिल्हा कार्याध्यक्ष श्री. दिनेश साळुंखे सर, तालुका संघटक श्री. संदीप पाटील सर, तसेच अमळनेर माध्यमिक विभागाचे तालुकाध्यक्ष श्री. सागर महाजन सर उपस्थित होते. नव्या नेतृत्वाला सर्वांनी मनःपूर्वक शुभेच्छा देत पुढील कार्यासाठी प्रेरणादायी शब्द दिले.

महाराष्ट्र टीचर्स असोसिएशनच्या सर्वेसर्वा राज्याध्यक्षा सौ. शुभांगी पाटील ताई यांनी नव्या पदाधिकाऱ्यांचे अभिनंदन करत, “शिक्षकांच्या न्याय्य मागण्यांसाठी लढा अधिक जोमाने चालवा; संघटना नेहमी तुमच्या सोबत आहे,” असा विश्वास व्यक्त केला.

अमळनेर विभागात शिक्षकांसाठी नवी ऊर्जा, नवे नेतृत्व आणि नव्या आशावादाची सुरुवात या निवडीनिमित्ताने झाली असल्याचे सर्व शिक्षकवर्गातून व्यक्त होत आहे.