पिंपळे नाल्याच्या कथित अतिक्रमणाविरोधात २ ऑक्टोबरला अमरण उपोषण संयुक्त मोजणी, अतिक्रमणाचा पंचनामा करून दोषींवर कारवाईची भूषण भदाणे यांची मागणी

अमळनेर प्रतिनिधी : प्रभाग क्रमांक १६ मधील पिंपळे नाल्याच्या नैसर्गिक प्रवाहावर लेआऊटधारक व बिल्डरांकडून कथित भराव आणि अतिक्रमण झाल्याच्या तक्रारीवर प्रशासनाने तातडीने मोजणी करून आवश्यक ती कारवाई करावी, या मागणीसाठी राष्ट्रवादी युवकचे जिल्हाध्यक्ष भूषण संजय भदाणे हे २ ऑक्टोबर रोजी अमळनेर प्रांत कार्यालयासमोर अमरण उपोषणास बसणार आहेत.

पिंपळे नाल्याचा नैसर्गिक प्रवाह अबाधित राहणे आवश्यक असून, कथित अतिक्रमणामुळे भविष्यात पावसाळ्यात पाण्याचा निचरा बाधित होण्याची शक्यता असल्याचा मुद्दा भदाणे यांनी उपस्थित केला आहे. त्यामुळे प्रशासनाने या प्रकरणाची गांभीर्याने दखल घेऊन तातडीने कार्यवाही करावी, अशी मागणी त्यांनी केली आहे.

संयुक्त मोजणीची मागणी

पिंपळे नाल्याची संबंधित विभागांच्या उपस्थितीत संयुक्त मोजणी करून नाल्याची मूळ हद्द व नैसर्गिक रुंदी निश्चित करावी, अशी मागणी करण्यात आली आहे. तसेच कथित अतिक्रमणाबाबत प्रत्यक्ष पाहणी करून पंचनामा करावा आणि अतिक्रमण आढळून आल्यास संबंधितांवर नियमानुसार फौजदारी व प्रशासकीय कारवाई करावी, असे भदाणे यांनी म्हटले आहे.

“पूराची वाट पाहू नका; नाल्याचा नैसर्गिक प्रवाह वाचवा!”

या प्रश्नाकडे प्रशासनाचे लक्ष वेधण्यासाठी भदाणे यांनी २ ऑक्टोबरच्या अमरण उपोषणाची अंतिम पूर्वसूचना दिली आहे. “पूराची वाट पाहू नका; नाल्याचा नैसर्गिक प्रवाह वाचवा!” असा संदेश देत त्यांनी प्रशासनाने उपोषणापूर्वीच या प्रकरणात ठोस पावले उचलावीत, अशी अपेक्षा व्यक्त केली आहे.

कथित अतिक्रमणाची प्रत्यक्ष स्थिती, मोजणीचा अहवाल आणि प्रशासनाची पुढील कारवाई यावर या प्रकरणाचे पुढील चित्र स्पष्ट होणार आहे.