शालेय शासकीय फुटबॉल स्पर्धा अतिशय चुरशीच्या वातावरणात संपन्न , तालुक्यातील १७ संघांचा सहभाग; विजयी संघांची जिल्हास्तरीय स्पर्धेसाठी निवड

अमळनेर प्रतिनिधी : क्रीडा व युवक सेवा संचालनालय, महाराष्ट्र राज्य, पुणे, जिल्हा क्रीडा अधिकारी कार्यालय, जळगाव, पंचायत समिती अमळनेर, शिक्षण विभाग अमळनेर व तालुका क्रीडा समिती यांच्या संयुक्त विद्यमाने आयोजित शालेय शासकीय फुटबॉल स्पर्धा तालुका क्रीडा संकुल, मारवड रोड, अमळनेर येथे उत्साहात पार पडल्या. या स्पर्धेत तालुक्यातील १७ फुटबॉल संघांनी सहभाग घेतला. अत्यंत चुरशीच्या व अटीतटीच्या सामन्यांमुळे संकुल परिसरात संपूर्ण वातावरण क्रीडामय झाले होते. अनेक सामने अतिरिक्त वेळेत गेले, तर काही सामन्यांचा निकाल पेनल्टी शूटआऊटद्वारे लागला.

स्पर्धेचे उद्घाटन अमळनेर अर्बन बँकेच्या उपाध्यक्षा व खा. शि. मं.च्या विश्वस्त ताईसो. वसुंधराताई लांडगे, अमळनेर पोलीस अधिकारी व क्रिकेट अष्टपैलू खेळाडू श्री. समाधान गायकवाड, अर्बन बँकेचे अध्यक्ष व माजी नगरसेवक श्री. अभिषेकभाऊ पाटील, प्रताप कॉलेजचे उपप्राचार्य प्रा. ए. के. अग्रवाल, पोलीस श्री. मयुर पाटील, तालुका क्रीडा अध्यक्ष श्री. एस. पी. वाघ सर आदी मान्यवरांच्या हस्ते करण्यात आले. मान्यवरांनी फुटबॉल व मैदानाचे पूजन करून श्रीफळ वाढवून स्पर्धेचे उद्घाटन केले.

यावेळी उपस्थित सर्व मान्यवर तसेच पंच अर्शद शेख, सागर चावरिया, अल्तमश सैय्यद, लकी चावरिया व जय जाधव यांचा बुके व शाल देऊन सन्मान करण्यात आला. उद्घाटनानंतर विविध गुणवंत खेळाडूंचाही सत्कार करण्यात आला.

खेळाडूंनी मेहनतीने क्रीडा क्षेत्रात यश मिळवावे

यावेळी मार्गदर्शन करताना पोलीस अधिकारी श्री. समाधान गायकवाड यांनी खेळाडूंनी मेहनत करून क्रीडा क्षेत्रात यश संपादन करावे, तसेच शासकीय सेवेत जाऊन देशसेवा करावी, असे आवाहन केले.

ताईसो. वसुंधरा लांडगे यांनी खेळाडू शिस्तबद्ध असतो, असे सांगत खेळाडूंना प्रोत्साहन दिले. त्यांनी “हारी बाजी को जीतना हमें आता है...” हे गीत तालासुरात सादर करून खेळाडूंना शुभेच्छा दिल्या.

विविध गटांतील विजेते व उपविजेते

१४ वर्षे मुले :

विजेता – स्वामी विवेकानंद स्कूल, अमळनेर

उपविजेता – सेंट मेरी ई. मेडि. स्कूल, मंगरुळ

१४ वर्षे मुली :

विजेता – अॅड. ललिता पाटील ई. नॅश. स्कूल, अमळनेर

उपविजेता – स्वामी विवेकानंद स्कूल, अमळनेर

१७ वर्षे मुले :

विजेता – सेंट मेरी ई. मेडियम स्कूल, मंगरुळ

उपविजेता – स्वामी विवेकानंद ई. मेडि. स्कूल, अमळनेर

१७ वर्षे मुली :

विजेता – स्वामी विवेकानंद ई. नॅश. स्कूल, अमळनेर

उपविजेता – अॅड. ललिता पाटील ई. नॅश. स्कूल, अमळनेर

१९ वर्षे मुले :

विजेता – रॉयल उर्दू स्कूल अॅड. ज्यु. कॉलेज, अमळनेर

स्पर्धा यशस्वी करण्यासाठी सहकार्य

स्पर्धेच्या यशस्वी आयोजनासाठी तालुक्यातील श्री. गोकुळ बोरसे, श्री. सुनील करंदीकर, श्री. विनायक सूर्यवंशी, श्री. विनोद पाटील, श्री. योगेश पाटील, श्री. जय जाधव, श्री. सागर चावरिया, अर्शद शेख व श्री. दर्शन पाटील यांनी सहकार्य केले.

विजयी संघ दि. १ ते ३ ऑक्टोबरदरम्यान भुसावळ येथे होणाऱ्या जिल्हास्तरीय शालेय फुटबॉल स्पर्धेत अमळनेर तालुक्याचे प्रतिनिधित्व करणार आहेत. या सर्व संघांना पुढील स्पर्धेसाठी उपस्थित मान्यवर व क्रीडाप्रेमींकडून शुभेच्छा देण्यात आल्या.