डॉ. ए.पी.जे. अब्दुल कलाम जयंतीनिमित्त सरस्वती विद्यामंदिरात ‘वाचन प्रेरणा दिन’ उत्साहात साजरा प्रेरणादायी गोष्टींतून विद्यार्थ्यांना वाचनाची गोडी; गुलाबाई व दांडिया महोत्सवातील विजेत्यांचा गौरव

जळगाव प्रतिनिधी :

विद्यार्थ्यांमध्ये वाचनाची आवड निर्माण व्हावी, ज्ञानाची गोडी वाढावी आणि डॉ. ए.पी.जे. अब्दुल कलाम यांच्या विचारांतून प्रेरणा मिळावी, या उद्देशाने सरस्वती विद्यामंदिर प्राथमिक व माध्यमिक विद्यालयात डॉ. ए.पी.जे. अब्दुल कलाम जयंतीनिमित्त विनम्र अभिवादन करून ‘वाचन प्रेरणा दिन’ साजरा करण्यात आला.

यावेळी विद्यालयाच्या मुख्याध्यापिका नीलिमा भारंबे यांच्या हस्ते डॉ. अब्दुल कलाम यांच्या प्रतिमेला माल्यार्पण करून अभिवादन करण्यात आले. विद्यार्थ्यांना कलाम यांच्या जीवनावर आधारित प्रेरणादायी गोष्ट सांगण्यात आली. त्यानंतर या गोष्टीवर आधारित प्रश्नमंजुषा घेण्यात आली. या उपक्रमातून विद्यार्थ्यांना कलाम यांचे प्रेरणादायी जीवन, त्यांची जिद्द, मेहनत आणि ज्ञानाविषयीची निष्ठा यांची ओळख करून देण्यात आली.

दरम्यान, विद्यालयात आयोजित एकदिवसीय गुलाबाई महोत्सव आणि दांडिया महोत्सवात विजेते ठरलेल्या विद्यार्थ्यांचा बक्षीस वितरण सोहळाही पार पडला. संस्थाध्यक्ष मनोजकुमार पाटील आणि संचालक चिरंजीव रामराजे पाटील यांच्या हस्ते विजेत्या विद्यार्थ्यांना बक्षिसे देऊन गौरविण्यात आले. सांस्कृतिक उपक्रमांतील विद्यार्थ्यांच्या सहभागाचे कौतुक करून त्यांच्या कलागुणांना प्रोत्साहन देण्यात आले.

या कार्यक्रमाचे आयोजन व नियोजन सुवर्णलता अडकमोल आणि सविता ठाकरे यांनी केले. कार्यक्रमाच्या यशस्वितेसाठी रवी शिंदे, दीपाली जगताप, सीमा जोशी आणि सुदर्शन पाटील यांनी सहकार्य केले.

**वाचनातून ज्ञान, प्रेरणेतून प्रगती आणि सहभागातून व्यक्तिमत्त्व विकास** हा संदेश देणारा हा उपक्रम विद्यार्थ्यांसाठी प्रेरणादायी ठरला.