पक्षीमित्र जितेंद्र वाणी राज्यस्तरीय ‘निसर्ग मित्र आदर्श शिक्षक’ पुरस्काराने सन्मानित

अमळनेर प्रतिनिधी : साने गुरुजी विद्यामंदिराचे उपक्रमशील, कार्यतत्पर व आदर्श शिक्षक तथा पक्षीमित्र जितेंद्र वाणी सर यांच्या शैक्षणिक, सामाजिक आणि पर्यावरण क्षेत्रातील उल्लेखनीय कार्याची दखल घेत त्यांना ‘राज्यस्तरीय निसर्ग मित्र आदर्श शिक्षक पुरस्कार २०२६’ प्रदान करण्यात आला.

जळगाव येथील पोलीस अधीक्षक कार्यालयातील पद्मालय सभागृहात ४ ऑक्टोबर २०२६ रोजी झालेल्या राज्यस्तरीय पुरस्कार सोहळ्यात हा सन्मान प्रदान करण्यात आला. नॅशनल ह्यूमन राइट्स अँड अँटी करप्शन सोशल जस्टिस फाउंडेशन यांच्या वतीने आयोजित या सोहळ्यात विविध मान्यवरांच्या हस्ते वाणी सरांचा गौरव करण्यात आला.

गेल्या २९ वर्षांपासून शैक्षणिक क्षेत्रासोबतच सामाजिक व पर्यावरण संवर्धनाच्या क्षेत्रात सातत्याने कार्यरत राहून त्यांनी आपल्या कार्यातून वेगळी ओळख निर्माण केली आहे. पक्षी व निसर्ग संवर्धन, विद्यार्थ्यांमध्ये पर्यावरणविषयक जागृती तसेच विविध सामाजिक व शैक्षणिक उपक्रमांमध्ये त्यांचा सक्रिय सहभाग राहिला आहे. आपल्या कार्याप्रती असलेली सेवानिष्ठा, जिद्द, प्रामाणिकपणा आणि कार्यतत्परता यांची दखल घेत त्यांना हा प्रतिष्ठेचा पुरस्कार देण्यात आला.

या पुरस्कार सोहळ्यास नाशिक विभागाचे शिक्षक आमदार दादासो. किशोर दराडे, माध्यमिक शिक्षक संघटनेचे माजी संचालक व संस्थापक राष्ट्रीय अध्यक्ष दादासो. अशोक एस. पवार (मध्य प्रदेश), राज्याध्यक्ष दादासो. प्रफुल एस. पाटील, तसेच धरणगाव नगरपालिकेच्या नगराध्यक्षा लीलाताई चौधरी यांच्यासह विविध क्षेत्रातील मान्यवर उपस्थित होते.

जितेंद्र वाणी सरांना मिळालेल्या या सन्मानाबद्दल अमळनेर शिक्षण प्रसारक मंडळाचे अध्यक्ष हेमकांत पाटील, सचिव संदीप घोरपडे सर, सर्व कार्यकारी संचालक, मुख्याध्यापक संजीव पाटील सर, सहकारी शिक्षकवृंद तसेच मित्रपरिवाराच्या वतीने त्यांचे अभिनंदन करण्यात आले.

शैक्षणिक कार्यासोबत निसर्ग व पर्यावरण संवर्धनाची चळवळ अधिक व्यापक करण्यासाठी त्यांच्या पुढील वाटचालीस मनःपूर्वक शुभेच्छा!