विभागीय कुस्ती स्पर्धेत इंदिरा गांधी विद्यालयाचा दबदबा! कृष्णा महाजन व प्रथम पाटील यांची विभागस्तरावर सुवर्ण कामगिरी; राज्यस्तरीय स्पर्धेसाठी निवड

धरणगाव प्रतिनिधी(किरण चव्हाण)

: क्रीडा व युवक सेवा संचालनालय, महाराष्ट्र राज्य, पुणे यांच्या अंतर्गत जिल्हा क्रीडा परिषद व जिल्हा क्रीडा अधिकारी कार्यालय, जळगाव यांच्या वतीने येवला, जि. नाशिक येथील क्रीडा संकुलात विभागीय शालेय फ्रीस्टाइल कुस्ती व ग्रीको-रोमन कुस्ती स्पर्धेचे आयोजन करण्यात आले होते. या स्पर्धेत इंदिरा गांधी माध्यमिक विद्यालय व कनिष्ठ महाविद्यालय, धरणगावच्या विद्यार्थ्यांनी दमदार कामगिरी करत विभागीय विजेतेपदावर आपले नाव कोरले.

इयत्ता बारावी विज्ञान शाखेतील कृष्णा गोरख महाजन याने १९ वर्षांखालील ८६ किलो वजनी गटातील फ्रीस्टाइल कुस्ती स्पर्धेत विभागस्तरावर प्रथम क्रमांक पटकावला. तसेच प्रथम गोविंदा पाटील याने ग्रीको-रोमन कुस्तीच्या ९६ किलो वजनी गटात विभागस्तरावर प्रथम क्रमांक मिळवत विद्यालयाच्या शिरपेचात आणखी एक मानाचा तुरा रोवला.

दोन्ही खेळाडूंनी स्पर्धेत उत्कृष्ट डावपेच, ताकद आणि आत्मविश्वासाचे प्रदर्शन करत प्रतिस्पर्ध्यांवर मात केली. या उल्लेखनीय कामगिरीमुळे कृष्णा महाजन व प्रथम पाटील यांची राज्यस्तरीय शालेय फ्रीस्टाइल व ग्रीको-रोमन कुस्ती स्पर्धेसाठी निवड झाली आहे.

या दोन्ही खेळाडूंना विद्यालयाचे क्रीडा शिक्षक व प्रशिक्षक डी. एन. पाटील यांचे सातत्यपूर्ण मार्गदर्शन लाभले. त्यांच्या यशाबद्दल विद्यालयाचे चेअरमन डी. जी. पाटील, सचिव सी. के. पाटील, संचालक अश्विनकुमार पाटील, प्राचार्या सुरेखा पाटील, उपमुख्याध्यापक ए. एस. पाटील, पर्यवेक्षिका भारती पाटील तसेच सर्व शिक्षक व शिक्षकेतर कर्मचाऱ्यांनी कृष्णा महाजन, प्रथम पाटील आणि प्रशिक्षक डी. एन. पाटील यांचे अभिनंदन करून कौतुक केले.

फोटो कँप्शन

पै प्रथम गोविंदा पाटील

97kg ग्रीको रोमन