अंधारातील दीपस्तंभांची कहाणी शब्दबद्ध करणारे ‘उजेड पेरणारी माणसं’ बुधवारी प्रकाशात

जळगाव प्रतिनिधी :

समाजाच्या वाटचालीत स्वतःच्या कर्तृत्वाने प्रकाशाची वाट निर्माण करणाऱ्या माणसांची ओळख पुढील पिढ्यांपर्यंत पोहोचविण्याचे महत्त्वपूर्ण कार्य ‘उजेड पेरणारी माणसं’ या ललित व्यक्तिचित्रणात्मक पुस्तकातून करण्यात आले आहे. भुसावळ येथील लेखक आनंदा पाटील यांच्या या पुस्तकाची निर्मिती पुण्याच्या पेन पब्लिशिंग हाऊसने केली असून, पुस्तकाच्या द्वितीय आवृत्तीचा प्रकाशन सोहळा बुधवार, दि. ७ ऑक्टोबर रोजी जळगावात रंगणार आहे.

डॉ. अण्णासाहेब जी. डी. बेंडाळे महिला महाविद्यालय (स्वायत्त) येथील मराठी भाषा विभाग आणि प्रगतिशील लेखक संघ, उत्तर महाराष्ट्र यांच्या संयुक्त विद्यमाने अभिजात मराठी भाषा सप्ताहाच्या निमित्ताने हा साहित्यिक सोहळा आयोजित करण्यात आला आहे. सकाळी १० वाजता महाविद्यालयातील धांडे सभागृहात होणाऱ्या या कार्यक्रमात महाराष्ट्र राज्याचे निवडणूक आयुक्त दिनेश वाघमारे यांच्या हस्ते पुस्तकाचे प्रकाशन होईल.

कार्यक्रमाच्या अध्यक्षस्थानी महाविद्यालयाचे प्राचार्य डॉ. आर. के. नारखेडे राहणार असून, प्रमुख अतिथी म्हणून अनुसूचित जाती-जमाती आयोगाचे माजी सदस्य किशोर मेढे उपस्थित राहतील. प्रगतिशील लेखक संघाचे उत्तर महाराष्ट्र संघटक डॉ. मिलिंद बागूल तसेच उपप्राचार्य डॉ. सत्यजित साळवे यांची विशेष उपस्थिती राहणार आहे.

खान्देशातील कर्तृत्वाला शब्दांचा उजेड

‘उजेड पेरणारी माणसं’ हे केवळ व्यक्तिचित्रणांचे पुस्तक नसून, आपल्या अवतीभोवती कार्यरत असलेल्या अनेक उपेक्षित आणि दुर्लक्षित दीपस्तंभांचा साहित्यिक मागोवा घेणारा दस्तऐवज ठरतो. वामनदादा कर्डक यांचा वैचारिक वारसा पुढे नेणारे भीमशाहीर प्रतापसिंगदादा बोदडे, आंबेडकरी चळवळीला समृद्ध करणारे दिलीप घोडेस्वार, देश-विदेशातील ज्येष्ठांच्या स्पर्धांमध्ये आपल्या धावण्याने ठसा उमटविणारे आर. बी. भवार, आंतरराष्ट्रीय चित्रकार पिसूर्वो आणि साहित्यशास्त्री तेजपाल चौधरी यांच्यासह खान्देशातील तब्बल ८४ व्यक्तिमत्त्वांचा या पुस्तकातून वेध घेण्यात आला आहे.

या व्यक्तिमत्त्वांच्या संघर्षाची, ध्यासाची, कर्तृत्वाची आणि समाजासाठी दिलेल्या योगदानाची शब्दचित्रे वाचकांसमोर उभी राहत असल्याने पुस्तकाला वेगळी साहित्यिक उंची प्राप्त झाली आहे.

पहिली आवृत्ती २८ दिवसांत संपली

‘उजेड पेरणारी माणसं’च्या पहिल्या आवृत्तीला वाचकांचा उत्स्फूर्त प्रतिसाद मिळाला. अवघ्या २८ दिवसांत पहिली आवृत्ती संपल्याने या पुस्तकाच्या लोकप्रियतेची प्रचिती आली. आता बुधवारी द्वितीय आवृत्ती वाचकांच्या भेटीला येत आहे.

महाराष्ट्रासह गुजरात, दिल्ली, मध्य प्रदेश, राजस्थान, कर्नाटक तसेच परदेशातही हे पुस्तक पोहोचले आहे. शाळा-महाविद्यालयांमध्ये या पुस्तकाच्या सामूहिक रसग्रहणाचे उपक्रमही होत आहेत.

ज्या माणसांनी आपल्या कर्तृत्वाने समाजाच्या वाटेवर उजेड पेरला, त्यांच्या जीवनप्रवासाला साहित्याच्या शब्दांत जपणारे हे पुस्तक म्हणजे खान्देशच्या मातीतील कर्तृत्वाचा संवेदनशील दस्तऐवज ठरला आहे.