‘काव्य प्रबोधनी’च्या प्रकाशनासह ज्ञान, गुणवत्तेचा जागर!

ज्ञान, साहित्य आणि गुणवत्तेचा त्रिवेणी संगम; ‘सकल ज्ञानमहोत्सवा’चा उत्साहात प्रारंभ

शिक्षक दिनानिमित्त गुणवंतांचा सन्मान; समाजोपयोगी कार्य करणाऱ्या व्यक्ती आणि पत्रकारांचाही गौरव

जळगाव प्रतिनिधी : माहितीच्या युगात ज्ञानाचे महत्त्व अधोरेखित करत साहित्य, शिक्षण आणि सामाजिक योगदानाचा गौरव करणारा आगळावेगळा त्रिवेणी संगम जळगावात अनुभवायला मिळाला. जनमत प्रतिष्ठाण व वेदांत एज्युकेशन यांच्या वतीने आयोजित ‘सकल ज्ञानमहोत्सव’ पुस्तक प्रकाशन सोहळा, शिक्षक दिनानिमित्त सत्कार समारंभ आणि ज्ञानमहोत्सवाचा प्रारंभ असा संयुक्त कार्यक्रम रविवारी जिल्हाधिकारी कार्यालयातील अल्पबचत भवन येथे उत्साहपूर्ण वातावरणात पार पडला.
यावेळी मान्यवरांच्या हस्ते एरंडोल येथील लेखक निंबा पुना बडगुजर यांच्या ‘काव्य प्रबोधनी’ या काव्यसंग्रहाचे प्रकाशन करण्यात आले. तब्बल ७८ कवितांचा समावेश असलेला हा काव्यसंग्रह साहित्यप्रेमींसाठी महत्त्वपूर्ण ठरणारा असल्याचे यावेळी नमूद करण्यात आले. पुस्तक प्रकाशनानंतर विविध क्षेत्रांत उल्लेखनीय कामगिरी करणाऱ्या गुणवंतांचा सन्मान करण्यात आल्याने कार्यक्रमाला विशेष महत्त्व प्राप्त झाले.

ज्ञान आणि शिक्षणाच्या बदलत्या स्वरूपावर मार्गदर्शन

कार्यक्रमाचे प्रमुख वक्ते माजी डायट प्राचार्य निळकंठ आप्पा गायकवाड यांनी ज्ञान आणि शिक्षणाच्या बदलत्या स्वरूपावर प्रभावी विचार मांडले. आमदार राजूमामा भोळे यांनी शिक्षक आणि समाज यांच्यातील नाते अधोरेखित करत मार्गदर्शन केले. ज्ञानेश्वर महाराज जळके यांनी आपल्या ओघवत्या शैलीत ज्ञान, संस्कार आणि सामाजिक बांधिलकीचे महत्त्व विशद केले. कार्यक्रमाच्या अखेरीस डायटचे प्राचार्य डॉ. अनिल झोपे यांनी केलेले विचारपूर्ण भाषणही विशेष ठरले.

‘शिक्षक म्हणजे जीवनाला दिशा देणारा मार्गदर्शक’

‘शिक्षक म्हणजे केवळ शिकवणारा नव्हे, तर विद्यार्थ्यांच्या जीवनाला दिशा देणारा मार्गदर्शक असतो,’ हा महत्त्वपूर्ण संदेश या सोहळ्यातून देण्यात आला. गुणवंतांचा सन्मान हा केवळ पुरस्कार नसून त्यांच्या कार्यातून इतरांना प्रेरणा मिळावी, यासाठी केलेला गौरव असल्याचेही यावेळी अधोरेखित करण्यात आले.

विशेष म्हणजे हा गौरव केवळ शिक्षकांपुरता मर्यादित न राहता सामाजिक क्षेत्रात उल्लेखनीय व समाजोपयोगी कार्य करणाऱ्या व्यक्तींचाही सत्कार करण्यात आला. तसेच जनतेपर्यंत माहिती पोहोचविणाऱ्या वृत्तवाहिनी प्रतिनिधी आणि पत्रकारांचाही विशेष सन्मान करण्यात आला.

एकाच व्यासपीठावर ज्ञान-साहित्य-गुणवत्तेचा संगम

पुस्तक प्रकाशन, शिक्षक दिनानिमित्त सत्कार समारंभ आणि ‘सकल ज्ञानमहोत्सवा’चा प्रारंभ या तीनही बाबी एकाच व्यासपीठावर आल्याने कार्यक्रमाला खऱ्या अर्थाने ज्ञान, साहित्य आणि गुणवत्तेचा त्रिवेणी संगम लाभला. शिक्षक आणि समाज यांचे नाते अधिक दृढ करत ज्ञानाच्या माध्यमातून समाज घडविण्याचा संदेश या सोहळ्यातून देण्यात आला.
कार्यक्रमास प्रा. डॉ. संदीप पाटील यांच्यासह शिक्षण, साहित्य, सामाजिक व विविध क्षेत्रांतील मान्यवरांची उपस्थिती होती. हेमंत बडगुजर यांनी सूत्रसंचालन केले. श्री. पंकज नाले, वेदांत एज्युकेशनच्या संचालिका हर्षाली ढाके तसेच विधितज्ज्ञ निखिल पाटील यांचे सहकार्य व मार्गदर्शन लाभले.