हुतात्म्यांना मानवंदना देत ‘बदलाव जरुरी है’चा एल्गार

अमळनेरात भारतीय कम्युनिस्ट पक्षाची कॉर्नर सभा; ‘१ सप्टेंबर चलो दिल्ली’चे आवाहन

अमळनेर प्रतिनिधी :
अमळनेर येथील राणी लक्ष्मीबाई चौकातील हुतात्मास्तंभ येथे भारतीय कम्युनिस्ट पक्षाच्या वतीने हुतात्म्यांना मानवंदना देण्यात आली. कॉम्रेड श्रीपत पाटील व त्यांच्या आठ सहकारी कॉम्रेड यांच्या स्मृतिस्थळी कॉम्रेड निर्मला शिंदे व कॉम्रेड मंगल मैराळे यांच्या हस्ते पुष्पहार अर्पण करण्यात आला.
यावेळी दिवंगत कॉम्रेड लक्ष्मण शिंदे यांच्या प्रतिमेस जिल्हा सेक्रेटरी कॉम्रेड ज्ञानेश्वर पाटील व अँड. आर. डी. कच्छवा यांच्या हस्ते पुष्पहार अर्पण करून सामूहिक श्रद्धांजली वाहण्यात आली.

हुतात्म्यांच्या संघर्षाचा जागर

प्रास्ताविकात अँड. आर. डी. कच्छवा यांनी हुतात्म्यांना मानवंदना देत कॉम्रेड श्रीपत पाटील व अन्य हुतात्म्यांचा संघर्ष, मोर्चे तसेच कामगार चळवळीशी असलेली त्यांची निष्ठा याबाबत सविस्तर माहिती दिली.
जळगाव जिल्हा सेक्रेटरी कॉम्रेड ज्ञानेश्वर पाटील यांनी भारतीय कम्युनिस्ट पक्षाच्या ‘बदलाव जरुरी है’ या राष्ट्रीय अभियानाची माहिती देत उपस्थित कार्यकर्त्यांना **‘१ सप्टेंबर चलो दिल्ली’**चे आवाहन केले.

महागाई, बेरोजगारीवरून सरकारवर टीका

आपल्या भाषणात कॉम्रेड ज्ञानेश्वर पाटील यांनी देशातील व राज्यातील राजकीय, आर्थिक परिस्थितीचा आढावा घेत केंद्र व राज्यातील भाजप सरकारवर जोरदार टीका केली. भ्रष्टाचार, महागाई, बेरोजगारी, शेतकरी व कामगारांचे प्रश्न, शिक्षण-आरोग्य क्षेत्रातील समस्या तसेच विविध कथित घोटाळ्यांचा त्यांनी उल्लेख केला.
राम मंदिरातील देणगी, नाशिक कुंभमेळ्याशी संबंधित कथित प्रकरण, तलाठी-ग्रामसेवक भरती, शालार्थ आयडी प्रकरण आदी मुद्द्यांचा उल्लेख करत सरकारने भ्रष्टाचाराविरोधात कठोर भूमिका घ्यावी, अशी मागणी त्यांनी केली.

शेतकरी, आदिवासींच्या प्रश्नांवरही आवाज

आदिवासी व शेतकऱ्यांना त्यांच्या हक्काच्या सुविधा मिळाव्यात, गायरान व अतिक्रमणधारकांच्या प्रश्नांवर न्याय मिळावा, जल-जंगल-जमिनीवरील आदिवासींचे अधिकार अबाधित राहावेत, अशी भूमिका यावेळी मांडण्यात आली.
शेतकऱ्यांना सरसकट कर्जमाफी मिळावी तसेच नियमितपणे कर्जफेड करणाऱ्या शेतकऱ्यांनाही कर्जमाफीचा लाभ मिळावा, अशी मागणी करण्यात आली. सार्वजनिक प्रकल्प व महामंडळांच्या खासगीकरणास विरोध करत महागाई, बेरोजगारी, शिक्षणातील पेपरफुटी आणि आरोग्य व्यवस्थेतील प्रश्नांवरही सरकारने ठोस उपाययोजना कराव्यात, असे आवाहन करण्यात आले.

‘बदलाव जरुरी है’ अभियान तीव्र करण्याचा निर्धार

देशातील सार्वजनिक मालमत्तेचे खासगीकरण, कॉर्पोरेट क्षेत्राला मिळणारे कथित कर्जसवलती, शेतकरी व सर्वसामान्य नागरिकांच्या प्रश्नांकडे होणारे दुर्लक्ष या मुद्द्यांवर जनजागृती करण्यासाठी भारतीय कम्युनिस्ट पक्षाच्या वतीने ‘बदलाव जरुरी है’ अभियान राबविण्यात येत असल्याचे पाटील यांनी सांगितले.
हुतात्म्यांना मानवंदना देण्याच्या निमित्ताने आयोजित या कॉर्नर सभेतून आगामी आंदोलनांची दिशा स्पष्ट करण्यात आली.

कार्यक्रमाचा समारोप तालुका सेक्रेटरी कॉम्रेड वाल्मीक मैराळे यांच्या आभार प्रदर्शनाने झाला.
यावेळी जिल्हा कौन्सिल सदस्य कॉम्रेड निर्मला शिंदे, कॉम्रेड नारायण मैराळे, कॉम्रेड निलाबाई भिल, कॉम्रेड मंगलाबाई मैराळे, सरफराज शहा, हरीश पवार, मन्सूर शाह, दिनेश पाटील, सुरेश शिंदे यांच्यासह भारतीय कम्युनिस्ट पक्षाचे कार्यकर्ते उपस्थित होते.