ए. टी. झांबरे माध्यमिक विद्यालयाचा राज्यस्तरीय स्वच्छ शाळा स्पर्धेत गौरव; तालुका विभागातून तृतीय 

ए. टी. झांबरे माध्यमिक विद्यालयाचा राज्यस्तरीय स्वच्छ शाळा स्पर्धेत गौरव; तालुका विभागातून तृतीय

जळगांव प्रतिनिधी

जळगाव दि.२३/०८/२०२६ : स्वच्छता ही केवळ परिसर स्वच्छ ठेवण्याची कृती नसून ती एक संस्कार, जीवनपद्धती आणि सामाजिक जबाबदारी आहे, या विचारातून सातत्याने विविध उपक्रम राबविणाऱ्या के.सी.ई. सोसायटी, जळगाव संचलित ए. टी. झांबरे माध्यमिक विद्यालयाने आपल्या कार्याची राज्यस्तरावर ठळक छाप उमटविली आहे. गांधी रिसर्च फाउंडेशन, जळगाव आयोजित व जैन इरिगेशन सिस्टिम्स लिमिटेड प्रायोजित “गांधी तीर्थ स्वच्छ शाळा राज्यस्तरीय स्पर्धा २०२५-२६” मध्ये तालुका विभागातून राज्यस्तरावर तृतीय क्रमांकाचा बहुमान विद्यालयाने संपादन केला आहे.
या उल्लेखनीय यशाबद्दल विद्यालयाला सन्मानपत्र व तृतीय क्रमांकाची मानाची ट्रॉफी प्रदान करण्यात आली. राज्यस्तरीय स्वरूपाच्या या स्पर्धेतील तालुका विभागातून मिळालेला हा गौरव विद्यालयासाठी अभिमानाची बाब ठरली असून, स्वच्छता, पर्यावरण संवर्धन आणि विद्यार्थ्यांमध्ये सामाजिक जबाबदारीचे संस्कार रुजविण्यासाठी विद्यालयाने केलेल्या सातत्यपूर्ण प्रयत्नांची ही पावती मानली जात आहे.
या पुरस्काराचा पारितोषिक वितरण समारंभ रविवार, २३ ऑगस्ट २०२६ रोजी गांधी तीर्थ, जैन हिल्स, जळगाव येथील कस्तुरबा सभागृहात उत्साहपूर्ण वातावरणात संपन्न झाला.
या समारंभास मा. श्री. अशोक जैन – विश्वस्त, गांधी रिसर्च फाउंडेशन तथा अध्यक्ष, जैन इरिगेशन सिस्टिम्स लिमिटेड; मा. डॉ. शिल्पा नारायणन – संचालिका, आप्पा पटवर्धन प्रसारक व तंत्र निकेतन, देहू, पुणे; मा. श्री. आदित्य जिवने – आयुक्त, जळगाव शहर महानगरपालिका; तसेच गांधी रिसर्च फाउंडेशनचे संचालक श्री. गिरीश कुलकर्णी यांची प्रमुख उपस्थिती लाभली.
या मान्यवरांच्या उपस्थितीत के.सी.ई. सोसायटी, जळगाव संचलित ए. टी. झांबरे माध्यमिक विद्यालयाला गांधी तीर्थ स्वच्छ शाळा राज्यस्तरीय स्पर्धेत तालुका विभागातून राज्यस्तरावर प्राप्त झालेला तृतीय क्रमांकाचा पुरस्कार प्रदान करण्यात आला. मान्यवरांनी विद्यालयाच्या स्वच्छता व पर्यावरण संवर्धनाच्या उपक्रमांचे तसेच विद्यार्थ्यांच्या उत्स्फूर्त सहभागाचे विशेष कौतुक केले.
गांधी रिसर्च फाउंडेशनच्या या उपक्रमाचा उद्देश शाळांमध्ये स्वच्छतेची जाणीव निर्माण करणे, विद्यार्थ्यांमध्ये स्वच्छतेच्या सवयी रुजविणे आणि स्वच्छतेसोबतच शिस्त, स्वावलंबन, टीमवर्क, नियोजन, सामाजिक जबाबदारी व पर्यावरण संवर्धन यांसारखी मूल्ये विद्यार्थ्यांच्या जीवनाचा भाग बनविणे हा आहे.
या उद्देशाला अनुसरून के.सी.ई. सोसायटी, जळगाव संचलित ए. टी. झांबरे माध्यमिक विद्यालयाने वर्षभर विविध स्वच्छता व पर्यावरणपूरक उपक्रम प्रभावीपणे राबविले. शालेय परिसराची स्वच्छता व सुशोभीकरण, स्वच्छतागृहांची निगा, कचरा व्यवस्थापन, पर्यावरण संवर्धन, श्रमदान, स्वच्छतेविषयी जनजागृती तसेच विद्यार्थ्यांमध्ये स्वच्छतेच्या सवयी विकसित करण्यासाठी विविध उपक्रम सातत्याने राबविण्यात आले.
विद्यालयाने स्वच्छतेकडे केवळ स्पर्धेच्या दृष्टीने न पाहता विद्यार्थ्यांच्या दैनंदिन जीवनातील एक महत्त्वाचा संस्कार म्हणून पाहिले. विद्यार्थ्यांनी स्वतः पुढाकार घेत परिसर स्वच्छ ठेवणे, कचऱ्याचे योग्य व्यवस्थापन करणे, पर्यावरणाची काळजी घेणे आणि इतरांमध्ये स्वच्छतेबाबत जनजागृती करणे यामध्ये उत्स्फूर्त सहभाग नोंदविला.
या यशामागे के. सी. ई. सोसायटी जळगावचे अध्यक्ष श्री. नंदकुमारजी बेंडाळे, विद्यालयाच्या मुख्याध्यापिका श्रीमती प्रणिता झांबरे यांचे मार्गदर्शन व प्रेरणा लाभली. तसेच पर्यवेक्षक श्री. नरेंद्र पालवे, ज्येष्ठ शिक्षिका श्रीमती प्रतिभा लोहार, श्री. दिगंबर पाटील, श्री. एकनाथ पाचपांडे, श्री. निर्मल चतुर श्री. रफिक तडवी, श्रीमती रोहिणी पाटील श्री. वेदप्रकाश गडदे, श्री. संदेश करलकर आणि श्रीमती नूतन वराडे यांनी विविध उपक्रमांचे नियोजन व अंमलबजावणी करण्यासाठी विशेष परिश्रम घेतले.
विद्यालयातील सर्व शिक्षक व शिक्षकेतर कर्मचारी यांनीही या उपक्रमात मनापासून सहभाग नोंदविला. त्याचबरोबर विद्यालयातील सर्व विद्यार्थ्यांनी उत्स्फूर्त सहभाग घेऊन स्वच्छता अभियानाला व्यापक स्वरूप दिले. त्यामुळे मिळालेला हा पुरस्कार केवळ एका व्यक्तीच्या किंवा एका विभागाच्या प्रयत्नांचा नसून संपूर्ण विद्यालय परिवाराच्या सामूहिक प्रयत्नांचा गौरव ठरला आहे.
गांधी तीर्थ स्वच्छ शाळा राज्यस्तरीय स्पर्धेच्या तालुका विभागातून राज्यस्तरावर तृतीय क्रमांक मिळविणे ही ए. टी. झांबरे माध्यमिक विद्यालयाच्या वाटचालीतील महत्त्वपूर्ण उपलब्धी आहे. या यशामुळे विद्यालयाच्या शैक्षणिक कार्यासोबतच स्वच्छता, पर्यावरण संवर्धन, सामाजिक बांधिलकी आणि मूल्याधिष्ठित शिक्षणाच्या कार्याचीही राज्यस्तरावर दखल घेतली गेली आहे.
या पुरस्कारामुळे विद्यालयातील विद्यार्थी, शिक्षक व शिक्षकेतर कर्मचारी यांचा उत्साह वाढला असून भविष्यातही स्वच्छता, पर्यावरण संवर्धन आणि सामाजिक जबाबदारीच्या क्षेत्रात अधिक प्रभावी उपक्रम राबविण्याची प्रेरणा मिळाली आहे.
या उल्लेखनीय यशाबद्दल विद्यालयातील मुख्याध्यापिका श्रीमती प्रणिता झांबरे पर्यवेक्षक श्री नरेंद्र पालवे सर्व शिक्षक व शिक्षकेतर कर्मचारी, विद्यार्थी तसेच पालकवर्गाचे सर्व स्तरांतून अभिनंदन होत आहे.
स्वच्छतेतून संस्कार आणि संस्कारातून जबाबदार नागरिक घडविण्याच्या दिशेने ए. टी. झांबरे माध्यमिक विद्यालयाने मिळविलेला हा राज्यस्तरीय गौरव निश्चितच जळगावच्या शैक्षणिक क्षेत्रासाठी अभिमानाची बाब ठरला आहे.