मंगरूळ येथील स्वच्छालय कामावर अनियमिततेचे आरोप; ग्रामस्थांकडून चौकशीची मागणी

मंगरूळ येथील स्वच्छालय कामावर अनियमिततेचे आरोप; ग्रामस्थांकडून चौकशीची मागणी

अमळनेर (प्रतिनिधी) :
अमळनेर तालुक्यातील मंगरूळ गावात १५ व्या वित्त आयोगाच्या निधीतून उभारण्यात येत असलेल्या सार्वजनिक स्वच्छालयाच्या संरक्षण भिंतीच्या कामाबाबत काही अनियमितता झाल्याचा आरोप ग्रामस्थांकडून करण्यात आला आहे. यासंदर्भात ग्रामस्थ मिलिंद भिकन पाटील यांनी पंचायत समिती अमळनेर येथे लेखी तक्रारी सादर केल्याची माहिती आहे.
मिलिंद पाटील यांनी दिनांक १२ व २० जानेवारी २०२६ रोजी गटविकास अधिकारी, अमळनेर यांना लेखी स्वरूपात निवेदन व स्मरणपत्र दिले. संबंधित कामात अपेक्षित सुधारणा न झाल्याचे सांगत त्यांनी पंचायत समितीच्या संबंधित अभियंत्यांशीही संपर्क साधल्याचे नमूद केले आहे.
तक्रारीदरम्यान झालेल्या संभाषणात काही अनुचित वक्तव्य करण्यात आल्याचा आरोपही पाटील यांनी केला आहे. या संदर्भात त्यांनी वरिष्ठ अधिकाऱ्यांनी वस्तुस्थितीची चौकशी करावी, अशी मागणी केली आहे.

अनियमिततेबाबत करण्यात आलेले आरोप पुढीलप्रमाणे :

1️⃣ अंदाजपत्रकानुसार २२ स्तंभ उभारायचे असताना प्रत्यक्षात १४ स्तंभ उभारण्यात आल्याचा आरोप.
2️⃣ भिंतीची लांबी अंदाजपत्रकापेक्षा कमी असल्याची तक्रार.
3️⃣ स्तंभांच्या संख्येबाबत विसंगती लपविण्यासाठी घाईत प्लास्टर केल्याचा आरोप.
4️⃣ खांबांची खोली अंदाजपत्रकात नमूद १.२० मीटरऐवजी सुमारे २ फूट असल्याचे ग्रामस्थांचे म्हणणे.
5️⃣ फ्लायॲश विटांऐवजी इतर विटांचा वापर करून दर्जात तडजोड झाल्याची शक्यता व्यक्त.

ग्रामस्थांच्या मते, या बाबींची तांत्रिक तपासणी होणे आवश्यक आहे, जेणेकरून शासन निधीचा योग्य वापर झाल्याची खात्री होऊ शकेल.
जिल्हा परिषद जळगावचे मुख्य कार्यकारी अधिकारी तसेच गटविकास अधिकारी, अमळनेर यांनी या प्रकरणात निष्पक्ष चौकशी करून वस्तुस्थिती स्पष्ट करावी, अशी मागणी ग्रामस्थांनी केली आहे.

“ग्रामविकास निधी पारदर्शक पद्धतीने वापरला जावा आणि दोषी आढळल्यास योग्य ती कारवाई व्हावी,” अशी भूमिका ग्रामस्थ मिलिंद पाटील यांनी पत्रकारांशी बोलताना व्यक्त केली.