जळगावमध्ये एनएसयूआयच्या “विद्यार्थी संवाद मेळावा”तून नवचैतन्याचा संचार

जळगावमध्ये एनएसयूआयच्या “विद्यार्थी संवाद मेळावा”तून नवचैतन्याचा संचार

अमळनेर प्रतिनिधी
सुमारे दहा वर्षांच्या निष्क्रियतेनंतर जळगाव जिल्हा एनएसयूआयने पुन्हा एकदा जोरदार पुनरागमन करत “विद्यार्थी संवाद मेळावा” या प्रभावी कार्यक्रमाचे आयोजन केले. हा मेळावा जळगाव जिल्हा काँग्रेस कमिटीच्या कार्यालयात पार पडला असून, जिल्ह्यातील विविध महाविद्यालयांमधील विद्यार्थ्यांनी मोठ्या संख्येने सहभाग नोंदवला.
या संवाद मेळाव्याचा उद्देश जिल्ह्यातील एनएसयूआय संघटना पुन्हा उभारणे आणि प्रत्येक महाविद्यालयात एनएसयूआय समिती स्थापन करणे हा होता. विद्यार्थ्यांच्या हिताच्या विविध प्रश्नांवर आणि शैक्षणिक सुधारणांवर या कार्यक्रमात सखोल चर्चा करण्यात आली.
या संवादात गुणवत्तापूर्ण शिक्षणाची गरज, शासकीय पातळीवर महाविद्यालयीन शुल्क नियंत्रण, विद्यार्थी वसतिगृहांची स्वच्छता व लेखापरीक्षण, रॅगिंगविरोधी कठोर अंमलबजावणी, तसेच शैक्षणिक आणि सांस्कृतिक उपक्रमांद्वारे विद्यार्थ्यांमध्ये जागरूकता आणि जबाबदार नागरिकत्व घडविणे या महत्त्वाच्या विषयांवर विचारमंथन झाले.
विशेष म्हणजे विद्यार्थ्यांसाठी प्रश्नोत्तर सत्राचे आयोजन करण्यात आले होते. विद्यार्थ्यांनी आपल्या शंका व मतं थेट एनएसयूआयच्या पदाधिकाऱ्यांसमोर मांडली, ज्यांची समर्पक उत्तरे पाहुण्यांनी दिली. या सत्रामुळे संवाद अधिक अर्थपूर्ण आणि सहभागी बनला.
या मेळाव्यात अक्षय यादव क्रांतिवीर (राष्ट्रीय सचिव, एनएसयूआय), कांता गवला (राष्ट्रीय सचिव, एनएसयूआय), सागर सालुंखे (राज्य अध्यक्ष, महाराष्ट्र एनएसयूआय), आणि अ‍ॅड. कौस्तुभ पाटील (जळगाव जिल्हा प्रभारी, एनएसयूआय) यांची प्रमुख उपस्थिती होती. कार्यक्रमाचे समन्वयन घनश्याम महाजन, विवेक सपकळे, धनंजय चौधरी, आणि आर्य चौधरी यांनी केले.
जळगाव जिल्ह्यातील विविध महाविद्यालयांतील अनेक विद्यार्थ्यांच्या उत्स्फूर्त सहभागामुळे “विद्यार्थी संवाद मेळावा” हा कार्यक्रम अत्यंत यशस्वी ठरला. या माध्यमातून जळगावमधील एनएसयूआय संघटनेत नवचैतन्य निर्माण झाले असून, विद्यार्थ्यांच्या प्रश्नांना आवाज देण्याची नवी ऊर्जा निर्माण झाली आहे.