गरिबीवर मात करत नाजमिन पठाण हिची गोल्ड मेडलने चमकदार कामगिरी!”

“गरिबीवर मात करत नाजमिन पठाण हिची गोल्ड मेडलने चमकदार कामगिरी!”

अमळनेर प्रतिनिधी (ईश्वर महाजन)
अत्यंत प्रतिकूल आर्थिक परिस्थितीतून शिक्षणाचा दीप उजळत, आपल्या गावाचे आणि महाविद्यालयाचे नाव राज्यभर उज्ज्वल करणारी कन्या नाजमिन बी. महेमुद खॉ पठाण हिने अभूतपूर्व यश संपादन केले आहे.
मारवड येथील कै. न्हानाभाऊ मन्साराम तुकाराम पाटील कला महाविद्यालयात (TYBA) राज्यशास्त्र विषयात शिक्षण घेत असताना, नाजमिनने आपल्या कष्ट, चिकाटी आणि आत्मविश्वासाच्या जोरावर कवयित्री बहिणाबाई चौधरी उत्तर महाराष्ट्र विद्यापीठात (जळगाव) राज्यशास्त्र विषयात संपूर्ण विद्यापीठातून प्रथम क्रमांक मिळवत ‘गोल्ड मेडल’ पटकावले आहे.
हे यश केवळ तिच्या वैयक्तिक मेहनतीचे फल नाही, तर गरिबी, मर्यादा आणि संघर्षावर मिळवलेला प्रेरणादायी विजय आहे.
महाविद्यालयाचा अभिमान – परिसरात आनंदाचे वातावरण:
नाजमिनच्या या उज्ज्वल यशानंतर महाविद्यालयाचे प्राचार्य, प्राध्यापक, मित्रमैत्रिणी आणि गावकऱ्यांनी तिला अभिनंदनाचा वर्षाव केला आहे.
महाविद्यालयाचे प्राचार्य म्हणाले — “नाजमिनसारख्या विद्यार्थिनीमुळे आमच्या संस्थेचा आणि परिसराचा गौरव वाढला आहे. तिच्या यशाची प्रेरणा अनेक विद्यार्थ्यांना दिशा दाखवेल.”
कुटुंबाचा संघर्ष आणि अभिमान:
नाजमिन हिचे वडील महेमुद खॉ गफ्फार खॉ पठाण हे अत्यंत साध्या व आदर्श कुटुंबातील असून, मर्यादित साधनांमध्येही त्यांनी आपल्या मुलीला शिक्षण देण्याचा दृढ निश्चय ठेवला. त्या निश्चयाची फळं आज सुवर्णपदकाच्या रूपाने मिळाली आहेत. कळमसरे परिसरामध्ये सर्व समाज स्तरावरून तिचे मनःपूर्वक अभिनंदन करण्यात येत आहे महाविद्यालयाचे प्राचार्य शिक्षक वृंद यांचे तिला मार्गदर्शन मिळाले..
गावकऱ्यांनी सांगितले — “नाजमिनचे यश म्हणजे मेहनती, प्रामाणिकपणा आणि स्वप्नांवर विश्वास ठेवणाऱ्या प्रत्येक विद्यार्थ्याला प्रेरणा देणारी कहाणी आहे.”