आत्मविश्वासाचा नवा प्रकाश — दिव्यांग विद्यार्थ्यांसाठी विशेष उपक्रमाचे यशस्वी आयोजन दिव्यांग विद्यार्थ्यांसाठी विशेष प्रेरणादायी कार्यक्रम पारोळ्यात संपन्न ब्रम्हाकुमारीज, महाराष्ट्र शासन आणि चामुंडा माता संस्थेचा संयुक्त उपक्रम

आत्मविश्वासाचा नवा प्रकाश — दिव्यांग विद्यार्थ्यांसाठी विशेष उपक्रमाचे यशस्वी आयोजन

दिव्यांग विद्यार्थ्यांसाठी विशेष प्रेरणादायी कार्यक्रम पारोळ्यात संपन्न

ब्रम्हाकुमारीज, महाराष्ट्र शासन आणि चामुंडा माता संस्थेचा संयुक्त उपक्रम

अमळनेर प्रतिनिधी(ईश्वर महाजन(
ब्रम्हाकुमारीज माऊंट आबू (राजस्थान) आणि ब्रम्हाकुमारीज पारोळा शाखा यांच्या सौजन्याने, तसेच महाराष्ट्र शासनाच्या दिव्यांग संरक्षण आणि सक्षमीकरण मोहिमेच्या सहकार्याने चामुंडा माता बहुउद्देशीय विकास परिसर संचलित दिव्यांग मुला-मुलींच्या निवासी शाळेत आज एक विशेष कार्यक्रम अत्यंत प्रेरणादायी वातावरणात पार पडला.
या कार्यक्रमात दिव्यांग विद्यार्थ्यांसाठी ध्यान, योग, खेळ आणि कौशल्य विकास स्पर्धा आयोजित करण्यात आल्या. यामधून विद्यार्थ्यांच्या मानसिक, बौद्धिक व सामाजिक विकासास चालना देण्यात आली. कार्यक्रमामध्ये सहभागी विद्यार्थ्यांनी उत्स्फूर्त सहभाग नोंदवत आपली ऊर्जा आणि आत्मविश्वास दाखवला.
ब्रम्हाकुमारीज संस्थेच्या देशभर चालणाऱ्या उपक्रमाचा एक भाग म्हणून, या कार्यक्रमाचा मुख्य हेतू दिव्यांग विद्यार्थ्यांमध्ये आत्मविश्वास वाढवणे आणि सकारात्मक जीवनदृष्टी विकसित करणे हा होता.
कार्यक्रमात घेण्यात आलेल्या विविध स्पर्धांमध्ये विद्यार्थ्यांनी प्रचंड उत्साहाने भाग घेतला आणि नंतर विजेत्यांना बक्षिसांचे वितरण करण्यात आले. उपस्थित शिक्षक, पालक व समाजसेवक यांनी विद्यार्थ्यांच्या प्रगतीचे कौतुक करत आयोजकांचे आभार मानले.
हा उपक्रम केवळ एक कार्यक्रम न राहता, दिव्यांग विद्यार्थ्यांच्या सक्षमीकरणासाठी एक प्रेरणादायी पाऊल ठरल्याचे मत अनेकांनी व्यक्त केले.