महाराष्ट्राच्या तिजोरीवर वाढता ताण; हजारो कोटींच्या खर्चावर सवाल! , महसुली तूट, पुरवणी मागण्या आणि वाढते कर्ज… महाराष्ट्राच्या आर्थिक कारभारावर गंभीर प्रश्नचिन्ह!

अमळनेर प्रतिनिधी

महाराष्ट्राच्या आर्थिक परिस्थितीबाबत सध्या विविध स्तरांतून चिंता व्यक्त केली जात आहे. महसुली तूट सुमारे ४० हजार कोटी रुपये असताना तब्बल ९७ हजार कोटींच्या पुरवणी मागण्या का? असा थेट सवाल उपस्थित केला जात आहे.

एका बाजूला राज्याच्या तिजोरीवर कर्जाचा मोठा बोजा असल्याचे चित्र असताना दुसऱ्या बाजूला विविध योजनांसाठी आणि मोठ्या धार्मिक-सामाजिक आयोजनांसाठी हजारो कोटी रुपयांच्या खर्चाची चर्चा सुरू आहे. कुंभमेळ्यासाठी प्रस्तावित सुमारे ३५ हजार कोटींच्या खर्चाबाबतही आर्थिक प्राधान्यक्रमावर प्रश्न उपस्थित होत आहेत.

कर्ज वाढत असताना खर्चाचे नियोजन नेमके कोणत्या दिशेने? जनतेच्या पैशांचा हिशोब कोण देणार? हा प्रश्न आता केवळ विरोधकांचा राहिलेला नसून सामान्य करदात्यांच्या चर्चेचा विषय बनला आहे.

शेतकरी, बेरोजगार युवक, कर्मचारी, विद्यार्थी आणि सर्वसामान्य नागरिकांच्या मूलभूत गरजांसाठी निधीची आवश्यकता असताना हजारो कोटींच्या खर्चाला मंजुरी देताना सरकारने आर्थिक शिस्त आणि प्राधान्यक्रम स्पष्ट करणे गरजेचे आहे.

जनतेचा सवाल थेट आहे—

राज्याच्या तिजोरीवर कर्जाचा डोंगर वाढत असताना एवढ्या मोठ्या पुरवणी मागण्या कशासाठी?

खर्चाला मर्यादा कोण घालणार?

आणि महाराष्ट्राच्या पैशांचा अंतिम हिशोब जनतेला कधी मिळणार?

आकडे बोलत आहेत; आता सरकारने त्याचा हिशोब द्यावा!