अमळनेरमध्ये फार्मासिस्ट दिनानिमित्त विविध स्पर्धांचे आयोजन; ८४ पोस्टर्सच्या माध्यमातून विद्यार्थ्यांचे प्रभावी सादरीकरण

अमळनेरमध्ये फार्मासिस्ट दिनानिमित्त विविध स्पर्धांचे आयोजन; ८४ पोस्टर्सच्या माध्यमातून विद्यार्थ्यांचे प्रभावी सादरीकरण

अमळनेर प्रतिनिधी

खान्देश शिक्षण मंडळ संचलित स्व. पंढरीनाथ छगनशेठ भांडारकर कॉलेज ऑफ डी. फार्मसी आणि स्व.प्रा. र. का. केले कॉलेज ऑफ बी. फार्मसी, अमळनेर येथे 'जागतिक फार्मासिस्ट दिनाचे' औचित्य साधून विविध स्पर्धांचे उत्साहात आयोजन करण्यात आले.

या निमित्ताने प्रश्नमंजूषा (Quiz), रील्स मेकिंग (Reels Making), स्कीटून्स (Skitoons), नाटक-पथनाट्य (Drama & Street Play) आणि पोस्टर प्रेझेंटेशन यांसारख्या विविध स्पर्धा पार पडल्या. विशेष म्हणजे, या कार्यक्रमात तब्बल ८४ पोस्टर्स सादर झाली, ज्यामध्ये विद्यार्थ्यांनी मोठ्या संख्येने सहभाग घेत आपल्या कलागुणांचे व कौशल्याचे उत्कृष्ट प्रदर्शन केले. आरोग्य क्षेत्रात आणि औषध निर्माण शास्त्रामध्ये फार्मासिस्टचे असलेले महत्त्व, औषधांचा सुरक्षित वापर आणि जनजागृती याविषयी विद्यार्थ्यांनी आपल्या कलाकृती व सादरीकरणातून प्रभावी संदेश दिला. पोस्टर प्रेझेंटेशन स्पर्धेच्या मूल्यमापनात प्रा. डॉ. शशिकांत जोशी, प्रा. हेमलता सूर्यवंशी व प्रा. वैशाली महाजन यांचे मोलाचे योगदान लाभल्यामुळे कार्यक्रमाची शोभा वाढली.

सदर कार्यक्रमाचे सूत्रसंचालन कु. कल्याणी लांडगे आणि कु. रिमझिम तोलानी यांनी केले. कार्यक्रमादरम्यान फार्मसी महाविद्यालयाचे चेअरमन मा. योगेश मुंदडे यांनी विद्यार्थ्यांना मार्गदर्शन करताना सांगितले की, आरोग्य आणि औषध निर्माण क्षेत्रात फार्मासिस्टचे स्थान अत्यंत महत्त्वाचे असून, समाजाच्या आरोग्याची जपणूक करण्यात त्यांची भूमिका कणासारखी असते. विद्यार्थ्यांनी केवळ पुस्तकी ज्ञानावर अवलंबून न राहता अशा स्पर्धांच्या माध्यमातून आपल्या कलागुणांचा विकास करावा आणि भविष्यात एक आदर्श व जबाबदार फार्मासिस्ट म्हणून देशाची सेवा करावी, असा संदेश त्यांनी आपल्या मार्गदर्शक भाषणात दिला.

प्राचार्य डॉ. धनंजय एम. पाटील यांनी आपल्या मार्गदर्शक भाषणात सांगितले की, आजच्या काळात औषधांचा सुरक्षित वापर, त्याविषयीची जनजागृती आणि औषध निर्माण शास्त्रातील नवनवीन बदल समजून घेणे फार्मसीच्या विद्यार्थ्यांना अत्यंत आवश्यक आहे. विद्यार्थ्यांनी पोस्टर प्रेझेंटेशन, नाटक आणि रील्स मेकिंगसारख्या उपक्रमांत दाखवलेला उत्साह त्यांच्यातील उपजत सर्जनशीलता दर्शवतो. अशा उपक्रमांमुळे विद्यार्थ्यांचा आत्मविश्वास वाढून त्यांचा सर्वांगीण विकास होतो.

तसेच समन्वयक प्रा. डॉ. एम. एस. वाघ यांनी आपले मनोगत व्यक्त करत विद्यार्थ्यांना मोलाचे मार्गदर्शन केले. कार्यक्रमाच्या शेवटी प्रा. सतिष ब्राह्मणे यांनी आभार मानले.

कार्यक्रमाच्या यशस्वीतेसाठी महाविद्यालयाचे प्राचार्य, प्राध्यापकवृंद आणि शिक्षकेतर कर्मचाऱ्यांनी विशेष परिश्रम घेतले. विद्यार्थ्यांच्या सर्वांगीण विकासासाठी आणि त्यांच्यात सामाजिक जाणिवा रुजवण्यासाठी अशा स्पर्धांचे आयोजन नेहमीच प्रेरणादायी ठरते, असा सूर या वेळी उपस्थित मान्यवरांनी व्यक्त केला.