पत्रकाराच्या तक्रारीवरून न्यूज चॅनल संपादकाविरुद्ध गुन्हा दाखल; पोलिसांकडून तपास सुरू

अमळनेर | प्रतिनिधी

अमळनेर येथील ‘लेखन मंच’चे कार्यकारी संपादक तथा दैनिक ‘शौर्य मराठी’चे तालुका प्रतिनिधी अजय भामरे यांनी दिलेल्या तक्रारीवरून ‘सचोटी’ न्यूज चॅनलचे संपादक राजकुमार छाजेड यांच्याविरुद्ध ॲट्रॉसिटी कायद्यासह विविध कलमांन्वये गुन्हा दाखल करण्यात आला आहे. या प्रकरणाचा पुढील तपास पोलीस उपविभागीय अधिकारी विनायक कोते यांच्याकडे सोपविण्यात आला आहे.

अजय भामरे यांच्या तक्रारीनुसार, माहितीच्या अधिकारातून माहिती मिळविल्याच्या कारणावरून राजकुमार छाजेड यांनी कथितरीत्या जातिवाचक शब्दांचा वापर करून शिवीगाळ व धमकी दिली. तसेच, आपल्याला खोट्या गुन्ह्यात अडकविण्याचा प्रयत्न झाल्याने मानसिक त्रास सहन करावा लागल्याचेही भामरे यांनी तक्रारीत नमूद केले आहे. या संदर्भात त्यांनी यापूर्वी जळगाव जिल्हा पोलीस अधीक्षकांकडे तक्रार केल्याचे सांगितले.

या प्रकरणी भारतीय न्याय संहिता, २०२३ मधील कलम ३५१(२) व ३५२, तसेच अनुसूचित जाती व अनुसूचित जमाती (अत्याचार प्रतिबंधक) अधिनियम, १९८९ मधील कलम ३(१)(p), ३(१)(q), ३(१)(r), ३(१)(s) आणि ३(२)(va) अन्वये गुन्हा नोंदविण्यात आला आहे.

तक्रारीतील आरोपांच्या अनुषंगाने संबंधित प्रकरणाचा तपास सुरू असून, या प्रकरणातील वस्तुस्थिती आणि उपलब्ध पुराव्यांच्या आधारे पुढील कायदेशीर प्रक्रिया पार पडणार आहे.

दरम्यान, या प्रकरणाची निष्पक्ष व सखोल चौकशी करून कायद्यानुसार योग्य ती कारवाई करण्यात यावी, अशी मागणी करण्यात येत आहे.