कवितेमुळे पुनर्जन्म लाभला; म्हणूनच मी कवितेला आईच संबोधतो” कवी प्रा. वा. ना. आंधळे यांची भावस्पर्शी भावना; चौथ्या अखिल भारतीय शिव मराठी साहित्य संमेलनातील कवी संमेलनाला उत्स्फूर्त प्रतिसाद

त्र्यंबकेश्वर प्रतिनिधी : “माझ्या आईच्या पोटी मी जन्मलो आणि जगाचे दर्शन झाले. ऐन तारुण्यात माझा कवितेच्या पोटी जन्म झाला आणि जग मला ओळखू लागले. आईने बोट धरून चालायला शिकवले, तर कवितेने बोट धरून बोलायला शिकवले. आई आशीर्वाद देताना ‘औक्षवंत हो’ म्हणायची, तर कविता आशीर्वाद देताना ‘मी तुला चिरंजीव करीन’ असे म्हणते. कवितेने मला भरभरून ओळख दिली. म्हणूनच मी तिला आईच संबोधतो,” अशी अत्यंत भावस्पर्शी भावना सुप्रसिद्ध कवी प्रा. वा. ना. आंधळे यांनी व्यक्त केली.

शिवचरण उज्जैनकर फाउंडेशन, मुक्ताईनगर, जिल्हा जळगाव यांच्या वतीने दि. ३ व ४ ऑक्टोबर २०२६ रोजी आयोजित चौथे अखिल भारतीय शिव मराठी साहित्य संमेलन त्र्यंबकेश्वर येथील संतश्रेष्ठ निवृत्तीनाथ महाराज साहित्य नगरी व आदिशक्ती संत मुक्ताई व्यासपीठावर उत्साहात संपन्न झाले. संत निवृत्तीनाथ महाराज समाधी मंदिराशेजारील भव्य सभागृहात झालेल्या कवी संमेलनाच्या अध्यक्षस्थानावरून प्रा. आंधळे बोलत होते.

संभाजीनगर येथील उज्जैनकर फाउंडेशनचे राज्य अध्यक्ष तथा सुप्रसिद्ध साहित्यिक प्रा. डॉ. सुभाष बागल यांच्या अध्यक्षतेखाली हे संमेलन भव्य आणि दिव्य स्वरूपात पार पडले. संमेलनातील भव्य ग्रंथदिंडी सर्वांचे आकर्षण ठरली. यावेळी संतश्रेष्ठ निवृत्तीनाथ महाराजांना आदिशक्ती संत मुक्ताईकडून भव्य हार अर्पण करण्यात आला. हा सोहळा संमेलनाचे विशेष आकर्षण ठरला.

कवी संमेलनात कवितांचा बहारदार जागर

एरंडोल, जिल्हा जळगाव येथील सुप्रसिद्ध कवी प्रा. वा. ना. आंधळे यांच्या अध्यक्षतेखाली झालेल्या कवी संमेलनाने रसिकांची मने जिंकली. महाराष्ट्रातील विविध जिल्ह्यांसह गोवा, कर्नाटक आणि गुजरात येथून आलेल्या कवी-कवयित्रींनी आपल्या दर्जेदार कविता सादर करून उपस्थितांची उत्स्फूर्त दाद मिळवली.

यावेळी व्यासपीठावर फाउंडेशनचे डॉ. मारुती गुरव, ज्येष्ठ साहित्यिक तुळशीराम बोबडे, वासुदेव खोपडे, प्रा. डॉ. मंदा नांदुरकर, संजय ठोसर, कवी अशोक मोहिते, प्राचार्य डॉ. पंढरीनाथ शेळके, सौ. रूपाली चिंचोलकर, सौ. मेघा पाटील, प्रा. विनायक पाटील, जगन्नाथ बुडूखले गुरुजी, पांडुरंग दैवज्ञ, शंकरराव अनासुने, बाळु भाऊ इटणारे, कवी रामदास कोरडे आदी मान्यवर उपस्थित होते.

तसेच नाशिक, जळगाव, भुसावळ, नांद्रा, एरंडोल, धाराशिव, शिरपूर, धुळे, बदलापूर, बुलढाणा, कोल्हापूर, लातूर, बेळगाव, पुणे आदी विविध ठिकाणांहून आलेल्या कवी-कवयित्रींनी कवी संमेलनात उत्स्फूर्त सहभाग नोंदविला.

“कवितेने जगण्याला मोल दिले”

प्रा. आंधळे यांनी आपल्या भाषणातून कवितेचे महत्त्व अधोरेखित करताना सांगितले की, “कविता जन्माला आली आणि जगण्याला मोल आले. दृष्टी आणि सृष्टी सुंदर झाली. कविता भेदाच्या पलीकडे नांदते आणि वयाच्या मर्यादाही तिला आड येत नाहीत. त्यामुळे जगाचे मातृपद कवितेकडे जाते.”

कवितेच्या सामर्थ्याचे विविध पैलू त्यांनी उदाहरणांसह रसिकांसमोर मांडले. त्यानंतर त्यांनी स्वतःची कविता सादर करताच सभागृहातून उत्स्फूर्त टाळ्यांचा कडकडाट झाला.

उज्जैनकर फाउंडेशनच्या आयोजनाचे कौतुक

संमेलनाच्या यशस्वी आयोजनाचे कौतुक करताना प्रा. आंधळे यांनी सांगितले की, गेल्या दोन दिवसांत विविध उपक्रमांनी आणि महाराष्ट्रासह विविध राज्यांतून आलेल्या साहित्यिक-रसिकांच्या उत्स्फूर्त सहभागामुळे संमेलनाला विशेष रंगत आली.

या संमेलनाच्या यशाचे श्रेय उज्जैनकर फाउंडेशनचे संस्थापक अध्यक्ष तथा मुख्य आयोजक डॉ. शिवचरण उज्जैनकर, त्यांचे कुटुंबीय, नातेवाईक तसेच फाउंडेशनच्या सर्व पदाधिकाऱ्यांना जाते, असे सांगत त्यांनी संमेलनाबद्दल कृतज्ञता व्यक्त केली.

कवी संमेलनाचे सूत्रसंचालन फाउंडेशनच्या धुळे जिल्हा उपाध्यक्षा सौ. प्रीती नंदलाल मोरे आणि नाशिक जिल्हा उपाध्यक्षा सौ. सारिका जोशी यांनी केले. साहित्य, कविता आणि रसिकांच्या उत्स्फूर्त प्रतिसादामुळे चौथे अखिल भारतीय शिव मराठी साहित्य संमेलन संस्मरणीय ठरले.