सातत्य आणि प्रामाणिक सेवेची पावती: शासकीय आश्रमशाळेच्या अधिक्षिका चारुशीला महाजन यांना ‘आदर्श कर्मचारी पुरस्कार’ प्रदान

जळगाव प्रतिनिधी

आदिवासी विकास विभाग, प्रकल्प कार्यालय यावल अंतर्गत शासकीय आश्रमशाळेत कार्यरत असलेल्या अधिक्षिका आयुष्यमती चारुशीला महाजन यांना त्यांच्या उत्कृष्ट आणि समर्पित सेवेबद्दल ‘आदर्श अधिकारी कर्मचारी पुरस्कार’ जाहीर करण्यात आला आहे. जळगाव जिल्हाधिकारी कार्यालयात आज आयोजित एका विशेष समारंभात त्यांना या पुरस्काराने यथोचित सन्मानित करण्यात आले.

या गौरव सोहळ्याप्रसंगी प्रमुख पाहुणे म्हणून जळगाव शहराचे आमदार राजू मामा भोळे, आदिवासी विकास विभाग यावल प्रकल्पाचे प्रकल्प अधिकारी अरुण पवार, सहाय्यक प्रकल्प अधिकारी संदीप पाटील, मिलिंद पाईकराव व मुसळे सर उपस्थित होते. तसेच या कार्यक्रमाला मार्गदर्शक म्हणून सहाय्यक आयुक्त (आदिवासी विकास, नाशिक) राजेंद्र हिवाळे यांची विशेष उपस्थिती लाभली होती.

चारुशीला महाजन यांचा सेवाप्रवास अत्यंत खडतर आणि आव्हानात्मक राहिला आहे. आदिवासी विकास विभागातील लेडीज (अधिक्षिका) पदाची जबाबदारी म्हणजे अत्यंत जोखमीचे आणि तारेवरची कसरत असणारे काम मानले जाते. २४ तास आणि ७ दिवस सेवेसाठी बांधील असणाऱ्या या पदावर कार्यरत असताना, चारुशीला यांनी पहिल्या दिवसापासून हॉस्टेलला आपले घर मानून निरंतर सेवा दिली आहे. त्यांनी आपल्या नोकरीची सुरुवात पिंगळवाडे आश्रमशाळेतून केली होती. सद्यस्थितीत त्या दहिवद येथे कार्यरत असून, आश्रमशाळेतील मुलींची पुरेपूर दक्षता आणि सुरक्षितता कशी घेतली जाईल, याकडे त्यांचा नेहमीच कटाक्ष असतो.

वैयक्तिक आयुष्यातील अनेक प्रसंगांना बाजूला सारून, त्यांनी कर्तव्य भावनेला नेहमीच प्राधान्य दिले. "नोकरी मिळणे सोपे पण ती प्रामाणिकपणे टिकवणे कठीण" हा वसा जपत केलेल्या कामाची दखल आज शासनाने घेतली आहे. त्यांच्या या यशात संदानशिव परिवाराचे आधारस्तंभ असणारे आई व दादा, तसेच समाजकार्याची आवड असणारे त्यांचे पती (जीवनसाथी) दीपक संदानशिव यांच्या खंबीर साथीचा मोठा वाटा आहे. आई-वडिलांनी सुनांना दिलेले स्वातंत्र्य आणि त्यांच्या शहाणपणाचा हा परिपाक असल्याचे परिवाराकडून सांगण्यात आले.

हा बहुमान मिळाल्याबद्दल दहिवद शासकीय आश्रमशाळेचे मुख्याध्यापक नितीन शिरसाट, सर्व शिक्षक वृंद आणि इतर कर्मचाऱ्यांकडून चारुशीला महाजन यांचे भरभरून अभिनंदन करण्यात येत आहे. परिवारातील सदस्यांच्या आणि मान्यवरांच्या उपस्थितीत मिळालेला हा सन्मान त्यांच्या भविष्यातील उज्ज्वल कारकिर्दीसाठी प्रेरणादायी ठरेल. परिवर्तनवादी महामानव व महामातांच्या विचारांतून त्यांचा हा समाजकार्याचा वसा असाच पुढे सुरू राहील, असा विश्वास यावेळी व्यक्त करण्यात आला.