साहित्य आणि उद्योगी सेवाकर्मींचा असाही सन्मान… सहजीवनाच्या ४० वर्षांचा गौरव : मोरे दाम्पत्याचा ‘सहजीवन सोहळा’ गोव्यात होणार उत्साहात साजरा

साहित्य आणि उद्योगी सेवाकर्मींचा असाही सन्मान…

सहजीवनाच्या ४० वर्षांचा गौरव : मोरे दाम्पत्याचा ‘सहजीवन सोहळा’ गोव्यात होणार उत्साहात साजरा

अनेक मान्यवरांची उपस्थिती, गोव्यात होणार गोवा, महाराष्ट्र सांस्कृतिक आचार विचाराची देवाणघेवाण

मुंबई : मनोहर साहित्य मंडळी, सोलापूर आणि महाराष्ट्र साहित्य परिषद, पुणे शाखा (पश्चिम – मनोरा, सोलापूर) यांच्या संयुक्त विद्यमाने साहित्यिक, कलाप्रेमी व रसिक दाम्पत्य लेखक ज्येष्ठ साहित्यिक श्रीकांत मोरे व ज्येष्ठ उद्योजक शोभा मोरे यांच्या सहजीवनाच्या ४० वर्षांच्या प्रवासानिमित्त ‘सहजीवन सोहळा’ या विशेष कार्यक्रमाचे आयोजन करण्यात आले आहे. हा सोहळा गोवा येथील मित्रमंडळींसह साजरा केला जाणार असून विविध साहित्यिक आणि सांस्कृतिक उपक्रमांनी तो समृद्ध होणार आहे.

या सोहळ्यात गोव्यातील पाच कलाप्रेमी, सेवाभावी दाम्पत्यांचा सन्मान करण्यात येणार आहे. तसेच ‘सहजीवन’ या विषयावर आधारित खास कवीसंमेलनाचे आयोजन करण्यात आले असून नामवंत तसेच युवा कवी-कवयित्री आपल्या निवडक कवितांद्वारे उपस्थितांना भावविश्वात नेतील.
कार्यक्रमाचे अध्यक्षस्थान प्रा. अनिल सामंत (अध्यक्ष, गोवा मराठी अकादमी) भूषवणार आहेत. प्रमुख अतिथी म्हणून श्रीकांत मोरे व शोभा मोरे यांची उपस्थिती लाभणार असून संभाजीराव काकडे व संजीवनी काकडे यांच्यासह विविध मान्यवर उपस्थित राहणार आहेत. विशेष उपस्थितीमध्ये ज्येष्ठ सनदी अधिकारी आय ए एस अशोक काकडे, ‘व्हॉईस ऑफ मीडिया’ व्ही ओ एम इंटरनॅशनल फोरमचे संस्थापक,आंतरराष्ट्रीय अध्यक्ष, संदीप काळे आणि लेखिका डॉ. अनुजा जोशी यांचा समावेश आहे. यावेळी विविध सन्मानार्थी दाम्पत्यांचा गौरव करण्यात येईल.
यानंतर ‘रंग सहजीवनाचे’ या कवीसंमेलनात दया मित्रगोटी, कविता बोर्कर, अंजली चिटळे, चंद्रशेखर गावस, डॉ. विनय बापट, मेघना कुडवाडकर, डॉ. नीता तोरणे, लक्ष्मण पित्रे, सोनाली धिंगु पर्ब, पूर्णिमा देसाई यांच्यासह अनेक कवी सहभागी होणार आहेत. या कवीसंमेलनाचे अध्यक्षस्थान श्रीकांत मोरे व शोभा मोरे भूषवणार असून सूत्रसंचालन सौ. श्रुती हजारे करणार आहेत.
हा सोहळा मिरामार बीच परिसरातील गोवा मेरेट रिसोट येथे सोमवार, दि. २७ एप्रिल २०२६ रोजी दुपारी ४ ते ७ या वेळेत पार पडणार आहे.
साहित्य, कला आणि सहजीवनाच्या मूल्यांना उजाळा देणारा हा सोहळा संस्मरणीय ठरेल, अशी अपेक्षा व्यक्त होत असून सर्व रसिकांनी उपस्थित राहावे, असे आयोजकांनी आवाहन केले आहे.

चौकट : 2

सांस्कृतिक सेतूचा नवा अध्याय
गोवा आणि महाराष्ट्र या दोन राज्यांमधील सांस्कृतिक नातेसंबंध अधिक दृढ करणारा हा ‘सहजीवन सोहळा’ एक महत्त्वाचा दुवा ठरणार आहे. साहित्य, कला, काव्य आणि मानवी नात्यांचे सूक्ष्म रंग एकत्र आणत हा कार्यक्रम केवळ एका दाम्पत्याच्या सहजीवनाचा उत्सव नसून दोन सांस्कृतिक परंपरांचा संगम घडवणारा सेतू ठरेल. मराठी भाषेची अभिव्यक्ती, गोव्यातील सांस्कृतिक समृद्धी आणि महाराष्ट्रातील साहित्यिक परंपरा यांचा सुंदर मिलाफ या सोहळ्यात अनुभवायला मिळणार आहे. विविध कवी, साहित्यिक, प्रशासकीय अधिकारी आणि रसिकांच्या उपस्थितीत हा कार्यक्रम ‘सांस्कृतिक एकात्मतेचा उत्सव’ ठरेल, अशी अपेक्षा व्यक्त होत आहे.

✦ चौकट : 1
साहित्य–उद्योगातून घडलेले योगदान

ज्येष्ठ साहित्यिक श्रीकांत मोरे आणि ज्येष्ठ उद्योजिका शोभा मोरे या दाम्पत्याने महाराष्ट्रच्या सामाजिक, सांस्कृतिक आणि आर्थिक क्षेत्रात मोलाचे योगदान दिले आहे. त्यांच्या सहजीवनाचा प्रवास हा केवळ वैयक्तिक यशाचा नाही, तर समाजाभिमुख कार्याचा प्रेरणादायी आदर्श ठरतो. मराठी साहित्यविश्वात श्रीकांत मोरे यांनी आपल्या लेखणीद्वारे मानवी नातेसंबंध, समाजातील बदलते वास्तव आणि जीवनमूल्ये प्रभावीपणे मांडली. विविध साहित्यप्रकारांमधून त्यांनी विचारप्रवर्तक लेखन करत वाचकांच्या मनात वेगळी छाप निर्माण केली, तसेच साहित्यिक चळवळींमध्ये सक्रिय सहभाग घेत नवोदित लेखकांना व्यासपीठ उपलब्ध करून दिले. अनेक दर्जेदार साहित्य आणि पुस्तक निर्मितीतून महाराष्ट्र राज्याला मोरे यांनी ओळख मिळवून दिली आहे. मनोरमा बँकच्या माध्यमातून उद्योजिका म्हणून शोभा मोरे यांनी उद्योग क्षेत्रात उल्लेखनीय यश संपादन करताना सामाजिक बांधिलकीही जपली. रोजगारनिर्मिती, महिला सक्षमीकरण आणि विविध सामाजिक उपक्रमांमध्ये त्यांचा सक्रिय सहभाग राहिला असून ‘उद्योगातून समाजाला परत देणे’ ही त्यांची भूमिका अनेकांसाठी प्रेरणादायी ठरली आहे. या दाम्पत्याने सहजीवनातून ‘एकत्रित प्रगती’ची संकल्पना प्रत्यक्षात उतरवत साहित्य आणि उद्योग या दोन भिन्न क्षेत्रांचा सुंदर संगम साधला. त्यांच्या कार्यातून सांस्कृतिक जपणूक, सामाजिक जाणीव आणि आर्थिक सक्षमीकरण यांचा संतुलित मिलाफ दिसून येतो. त्यामुळेच त्यांची वाटचाल नव्या पिढीसाठी प्रेरणादायी ठरत असून त्यांच्या योगदानाचा गौरव हा संपूर्ण समाजासाठी अभिमानाची बाब ठरत आहे.