ग्रामीण मातीतून प्रशासकीय शिखराकडे; निलेश भदाणे यांची प्रेरणादायी यशोगाथा ,IT क्षेत्रातील स्थिर करिअरला दिला विराम; MPSCच्या माध्यमातून लोकसेवेची नवी वाटचाल

अमळनेर प्रतिनिधी :

ग्रामीण भागातील साध्या परिस्थितीतून शिक्षणासाठी दररोज ये-जा करत, जिद्द, मेहनत आणि चिकाटीच्या जोरावर दहिवद (ता. अमळनेर) येथील श्री. निलेश शशिकांत भदाणे यांनी यशाचा प्रेरणादायी प्रवास घडविला आहे.

B.Sc., M.Sc. शिक्षण पूर्ण केल्यानंतर त्यांनी मुंबईतील IT क्षेत्रात करिअरची सुरुवात केली. मात्र, स्थिर करिअरपेक्षा लोकसेवेचे स्वप्न अधिक महत्त्वाचे मानत त्यांनी प्रशासकीय सेवेकडे वाटचाल करण्याचा निर्णय घेतला. अथक परिश्रमाच्या बळावर त्यांनी २०१७ मध्ये महाराष्ट्र लोकसेवा आयोगाची (MPSC) परीक्षा उत्तीर्ण करत शासन सेवेत प्रवेश केला.

त्यानंतर त्यांच्या प्रशासकीय कारकिर्दीने सातत्याने उंच भरारी घेतली. अहिल्यानगर जिल्हा नियोजन अधिकारी, त्यानंतर पिंपरी-चिंचवड महानगरपालिका उपायुक्त आणि आता नाशिक महानगरपालिकेचे अतिरिक्त आयुक्त म्हणून त्यांची नियुक्ती झाली आहे.

ग्रामीण भागातून शिक्षण घेत, प्रतिकूल परिस्थितीवर मात करून शिक्षण आणि स्पर्धा परीक्षेच्या माध्यमातून प्रशासकीय सेवेत मिळविलेल्या या यशामुळे अमळनेर तालुक्यातील तरुणांसाठी निलेश भदाणे यांचा प्रवास प्रेरणादायी ठरत आहे.

पर्ल इंग्लिश मीडियम स्कूलचे चेअरमन चंद्रकांत भदाणे तसेच ग.स पतपेढीचे माजी उपाध्यक्ष श्यामकांत भदाणे यांचे ते पुतणे आहेत.

निलेश भदाणे यांच्या या उल्लेखनीय यशाबद्दल अमळनेर तालुक्यासह साई इंग्लिश अकॅडमी चे संचालक भैय्यासाहेब मगर, साने गुरुजी शाळेचे सेवानिवृत्त मुख्याध्यापक एस डी देशमुख व

मित्रपरिवार, नातेवाईक आणि विविध क्षेत्रांतून त्यांच्यावर अभिनंदनाचा वर्षाव होत आहे.

ग्रामीण परिस्थितीतून प्रशासकीय नेतृत्वापर्यंतचा हा प्रवास जिद्द, कष्ट आणि ध्येय निश्चित असेल तर यशाचे शिखर गाठता येते, याची प्रेरणादायी कहाणी ठरली आहे.