आनंददायी शनिवारला संत ज्ञानेश्वर विद्यालयात दांडियाचा जल्लोष! भुलाबाई महोत्सवांतर्गत विद्यार्थ्यांचा उत्स्फूर्त सहभाग; महाप्रसादाचा घेतला लाभ

मेहरूण, जळगाव प्रतिनिधी

विद्यार्थ्यांना शिक्षणासोबत सांस्कृतिक परंपरांची ओळख व्हावी, त्यांच्या कलागुणांना वाव मिळावा आणि शालेय जीवन आनंददायी व्हावे, या उद्देशाने श्री संत ज्ञानेश्वर प्राथमिक व माध्यमिक विद्यालय, मेहरूण येथे आनंददायी शनिवार व भुलाबाई महोत्सवांतर्गत दांडिया उत्सव उत्साहात साजरा करण्यात आला.

या वेळी विद्यार्थ्यांनी दांडिया नृत्यात उत्स्फूर्त सहभाग घेतला. पारंपरिक नृत्य, संगीत आणि उत्साहपूर्ण वातावरणामुळे विद्यालयात आनंदाचे वातावरण निर्माण झाले. विद्यार्थ्यांनी एकत्र येत दांडियाचा आनंद लुटला. अशा उपक्रमांमुळे विद्यार्थ्यांमध्ये सांघिक भावना, सहकार्य, आत्मविश्वास आणि भारतीय संस्कृतीविषयी आदरभाव वाढीस लागतो.

भुलाबाई महोत्सवाच्या निमित्ताने आयोजित या उपक्रमातून विद्यार्थ्यांना महाराष्ट्राच्या लोकपरंपरा आणि सांस्कृतिक वारशाची ओळख करून देण्यात आली. कार्यक्रमानंतर सर्व विद्यार्थ्यांनी महाप्रसादाचा लाभ घेतला.

अभ्यासासोबत आनंद, संस्कारांसोबत संस्कृती आणि उपक्रमांतून विद्यार्थ्यांचा सर्वांगीण विकास या उद्देशाने विद्यालयात विविध नाविन्यपूर्ण उपक्रम राबविण्यात येत आहेत.

विद्यालयाचे मुख्याध्यापक श्री. मुकेश सुरेश नाईक यांच्या मार्गदर्शनाखाली हा उपक्रम उत्साहात पार पडला.