महात्मा जोतीराव फुले हायस्कूलमध्ये ‘आनंददायी शनिवार’; करुणा क्लबच्या माध्यमातून विद्यार्थ्यांना वाहतूक नियमांचे मार्गदर्शन

महात्मा जोतीराव फुले हायस्कूलमध्ये ‘आनंददायी शनिवार’; करुणा क्लबच्या माध्यमातून विद्यार्थ्यांना वाहतूक नियमांचे मार्गदर्शन

अमळनेर प्रतिनिधी

: महात्मा जोतीराव फुले हायस्कूलमध्ये ‘आनंददायी शनिवार’ हा उपक्रम उत्साहपूर्ण वातावरणात राबविण्यात आला. या उपक्रमांतर्गत शाळेतील करुणा क्लबच्या माध्यमातून विद्यार्थ्यांना रहदारी व वाहतूक नियमांबाबत महत्त्वपूर्ण माहिती देण्यात आली.

विद्यार्थ्यांच्या दैनंदिन जीवनाशी निगडित असलेल्या रस्ते सुरक्षेच्या विषयावर मार्गदर्शन करताना वाहतूक नियमांचे पालन करणे, रस्ता ओलांडताना घ्यावयाची काळजी, वाहने चालविताना सुरक्षिततेला प्राधान्य देणे तसेच स्वतःसोबत इतरांच्या सुरक्षिततेची जबाबदारी ओळखणे याबाबत विद्यार्थ्यांमध्ये जनजागृती करण्यात आली. लहान वयातच वाहतूक नियमांची जाणीव निर्माण झाल्यास भविष्यात जबाबदार आणि शिस्तप्रिय नागरिक घडण्यास मदत होते, हा संदेश या उपक्रमातून देण्यात आला.

या वेळी शाळेचे मुख्याध्यापक अनिल महाजन, करुणा क्लबचे शिक्षक आय. आर. महाजन, एच. ओ. माळी व एस. के. महाजन तसेच शाळेतील शिक्षकेतर कर्मचारी उपस्थित होते.

‘आनंददायी शनिवार’च्या माध्यमातून शिक्षणासोबतच जीवनोपयोगी मूल्ये आणि सामाजिक जबाबदारीची जाणीव विद्यार्थ्यांमध्ये रुजविण्याचा हा उपक्रम कौतुकास्पद ठरला.