दि मॉडेल इंग्लिश स्कूल सैतवडे येथील विद्यार्थ्यांची मिरवणूक

दि मॉडेल इंग्लिश स्कूल सैतवडे
येथील विद्यार्थ्यांची मिरवणूक

रत्नागिरी जिल्ह्यातील मुस्लिम एज्युकेशन सोसायटी संचलित दि मॉडेल इंग्लिश स्कूल, सैतवडे येथील क्रीडा क्षेत्रात मिळवलेल्या दैदिप्यमान यशाबद्दल विद्यार्थ्यांचा उत्साह द्विगुणित करण्यासाठी सोमवार दिनांक ०१ डिसेंबर २०२५ रोजी एक भव्य मिरवणूक काढण्यात आली. शाळेच्या क्रीडापटूंनी राष्ट्रीय आणि विभागीय स्तरावर मिळवलेल्या नेत्रदीपक विजयामुळे संपूर्ण सैतवडे आणि जांभारी परिसरात मिरवणूक काढण्यात आली.दि मॉडेल इंग्लिश स्कूलच्या तीन विद्यार्थ्यांनी थेट राष्ट्रीय डॉजबॉल संघात आपले स्थान निश्चित केले आहे, ही शाळेसाठी अत्यंत अभिमानास्पद बाब ठरली आहे. याच विद्यार्थ्यांच्या कौशल्यामुळे महाराष्ट्र डॉजबॉल संघाने राष्ट्रीय स्तरावर विजेतेपद पटकावले. ग्रामीण भागातील विद्यार्थ्यांनी राष्ट्रीय स्तरावर केलेली ही दमदार व प्रेरणादायी कामगिरी आहे.
विभागीय स्पर्धेत वर्चस्व
राष्ट्रीय यशासोबतच, मॉडेल इंग्लिश स्कूलने विभागीय डॉजबॉल स्पर्धेतही आपले वर्चस्व सिद्ध केले. शाळेच्या मुलींचा संघ विभागीय डॉजबॉल स्पर्धा विजेता ठरला, तर मुलांच्या संघाने उपविजेतेपद पटकावून आपल्या शाळेचा क्रीडा क्षेत्रातील दबदबा कायम ठेवला. या सर्व खेळाडूंचे समर्पण आणि कठोर प्रशिक्षण या यशामागे उभे आहे.
वाजत गाजत निघाली भव्य मिरवणूक.या सर्व यशस्वी विद्यार्थ्यांचा आणि त्यांच्या मार्गदर्शक शिक्षकांचा गौरव करण्यासाठी शाळेकडून सैतवडे ते जांभारी पर्यंत मिरवणूक काढण्यात आली.यावेळी पालक, शाळेचे माजी विद्यार्थी आणि ग्रामस्थ मोठ्या संख्येने मिरवणुकीत उत्स्फूर्तपणे सहभागी झाले होते.
रस्त्याच्या दुतर्फा उभे राहून नागरिक टाळ्यांच्या गजरात आणि पुष्पवृष्टी करून या तरुण खेळाडूंचे अभिनंदन करत होते. ‘दि मॉडेल इंग्लिश स्कूलचा जयजयकार’ आणि ‘आमच्या खेळाडूंचा मान, महाराष्ट्राची शान’ अशा घोषणांनी परिसर दणाणून गेला होता. ही मिरवणूक केवळ खेळाडूंचा सत्कार नव्हता तर ग्रामीण भागातील शिक्षणासोबतच क्रीडा क्षेत्राला प्रोत्साहन देण्याच्या मुस्लिम एज्युकेशन सोसायटीच्या धोरणाचे ते प्रतीक होते.